Не може да се очекува ништо помалку од ПЕТА, која агресивно ја турка својата агенда за да спаси што повеќе животни, а пред сѐ оние што исчезнуваат секој ден во бесмислената трка на модните куќи да заработат што е можно повеќе. Нивната нова кампања е насочена точно таму каде што треба и е темпирана непосредно пред почетокот на новата Модна недела во Њујорк.
Помина една година од големата победа на ПЕТА над оние што користат природно крзно во своите модни колекции и сега организацијата планира да ѝ зададе нов удар на модната индустрија, која се обидува да го нормализира осакатувањето и убивањето на животни за правење џемпери, чанти и чевли.
- Тие имаат порака за своите жртви - направете нѐ убави, збогатете нѐ, направете нѐ секси. Вие немате чувства, немате право, немате избор - порачуваат од ПЕТА и токму тоа се наоѓа на новиот спот за кампањата.
- Овцата не е џемпер, исто како што жената не е сексуален предмет - вели во видеото потпретседателката на организацијата, Лиза Ланге, додека слики од измачени модели кои се принудени да позираат на одреден начин и да се однесуваат во согласност со нормите утврдени од модната индустрија одат заедно со слики од мртви животни.
Сцената воопшто не е убава, но е неопходна за да се преиспита застареното мислење дека овците, кравите и козите се тука за да ги измачуваме и да ги убиваме. Мотото на новата кампања е „Животните не се тука за да ги носиме“.
ПЕТА досега објави стотици снимки во кои се откриваат разни складишта и кланици каде што се измачуваат и убиваат животни, се малтретираат со електрошокови или се чуваат во нехумани услови. Во моментов нивната голема кампања е против една од водечките модни куќи, која упорно одбива да престане да користи материјали од животинско потекло.
Извор:
Noizz.rs
Фото: Screenshot/YouTube