Организацијата „Компјутерски онлајн библиотекарски центар“ (ОСLC), со седиште во Охајо, објави листа со 100 најчитани книги, а податоците се собрани од повеќе од 18.000 книжарници низ светот.

На прво место е неприкосновениот борец против ветерниците, бистриот витез од Манча, „Дон Кихот“, чија судбина ја испишал шпанскиот писател Мигел де Сервантес во далечната 1605 година. На листата со најчитани се најдоа и другите познати класици на Марк Твен, Емили и Шарлот Бронте итн.

- Секако дека на листата со најчитани книги се класиците - вели Скир Причард, претседател на организацијата OCLC што стои зад листата со најпопуларни книги во книжарниците низ светот.


На прво место се најде „Дон Кихот“ од Мигел де Сервантес. На второ место е „Алиса во земјата на чудата“ од Луис Карол, потоа две дела на Марк Твен - „Авантурите на Хаклбери Фин“ од 1884 и „Авантурите на Том Соер“ од 1876 година. На петтото место се најде „Островот со скриеното богатство“ на Роберт Луис Стивенсон од 1883 година.

По Стивенсон се наоѓаат три авторки - Џејн Остин со романот „Гордост и предрасуди“, кој култната британска писателка го објавила во 1813 година и „Разум и чувства“ од 1811 година. Потоа следуваат сестрите Бронте; Емили Бронте со „Оркански височини“, роман објавен во 1847 година под псевдонимот Елис Бел, и Шарлот Бронте со „Џејн Ејр“, објавен истата година под псевдонимот Курер Бел.

Меѓу авторите на листата со најчитани 100 книги е и Луиза Меј Алкот со „Малите жени“ што се најде на 16. место, потоа Мери Шели со „Франкенштајн“ на 19. место „Колибата на чичо Том“ од Хариета Бичер Стоу на 21. место „Да се убие птицата подбивница“ од Харпер Ли, на 29. место „Тајната градина“ на Френсис Хоџсон Барнет, на 45. место се најде Џ.К.Ролинг со серијалот „Хари Потер“ (од кои најчитан е „Хари Потер и каменот на мудроста“), на 46. место се најде швајцарската авторка Јохана Шпири со „Хајди“.

„Одвеано од виорот“, епскиот роман на Маргарет Мичел од 1936 година со незаборавната Скарлет О'Хара како главен лик, се најде на 77. место, а на 78. „Моја Антонија“ од Вила Катер.

На листата се најде и Чарлс Дикенс со неколку негови книги, од кои најчитана е „Божиќна приказна“ (13. место). „Злосторство и казна“ на Фјодор Достоевски се најде на 22. место, „Војна и мир“ на Лав Толстој на 28. место, „Ана Каренина“ на 38. место. Од другите добро познати класици најпопуларен е „Моби Дик“ на Херман Мелвил, кој се најде на 9. место, на 10. место „Писмото на Скарлет“ од Натаниел Хоторн и на 11. место „Гуливеровите патувања“ од Џонатан Свифт. Најновиот наслов меѓу 100. најчитани книги е „Кодот на Да Винчи“ од Ден Браун од 2003 година, кој се најде на 88. место.