Сè повеќе луѓе не сакаат да ги читаат вестите и ги опишуваат како депресивни, немилосрдни и досадни, покажа глобално истражување.

Скоро четири од 10 (39 отсто) луѓе ширум светот рекле дека понекогаш или често активно ги избегнуваат вестите, во споредба со 29 отсто во 2017 година, според извештајот на Институтот „Ројтерс“ на Универзитетот „Оксфорд“.

Војната во Украина и на Блискиот Исток можеби придонеле за желбата на луѓето да ги исклучат вестите, велат авторите на извештајот. Се вели дека избегнувањето вести сега е на рекордно највисоко ниво.

Извештајот покажа дека изборите го зголемија интересот за вестите во неколку земји, вклучително и САД. Сепак, според истражувањето, целокупниот тренд останува надолен.

Низ светот, 46 отсто од луѓето рекле дека се многу или екстремно заинтересирани за вести, што е намалување од 63 отсто во 2017 година. Во Велика Британија, интересот за вести е речиси преполовен од 2015 година.

Лоши вести

- Агендата за вести очигледно е особено тешка во последните години. Имавме пандемии и војни, па затоа е прилично природна реакција луѓето да се оттргнат од вестите, без разлика дали тоа е за да го заштитат своето ментално здравје или едноставно да продолжат со своите животи - вели Ник Њуман, главен автор на извештајот.

Њуман истакнува дека оние кои избираат селективно да ги избегнуваат вестите, често го прават тоа затоа што се чувствуваат „немоќно“. Некои луѓе се чувствуваат сè пооптоварено и се збунети од количината на вести, додека други се чувствуваат уморно од политиката. Според извештајот, жените и помладите луѓе имаат поголема веројатност да се чувствуваат преоптовареност од количината на вести.

Во меѓувреме, довербата во вестите останува стабилна на 40 отсто, но сепак е за 4 отсто пониска отколку што беше во екот на ковид-пандемијата, покажа истражувањето. Во Обединетото Кралство, довербата во вестите малку се зголеми оваа година на 36 отсто, но сепак е околу 15 процентни поени пониска отколку пред референдумот за Брегзит во 2016 година.

Извештајот покажа дека публиката за традиционалните извори на вести, како што се ТВ и печатените медиуми, нагло се намалила во текот на изминатата деценија, при што помладите луѓе претпочитаат да ги добиваат своите вести онлајн или преку социјалните медиуми.

Најважната платформа на социјалните медиуми за вести и понатаму е „Фејсбук“, иако е во долгорочен пад. „Јутјуб“ и „Вацап“ остануваат важни извори на вести за многумина, додека „Тик-ток“ е во пораст и сега за првпат го надмина „Твитер“.

Поврзано со овие промени, видеото станува сè поважен извор на онлајн вести, особено кај помладите. Според извештајот, најатрактивни се кратките вести.

- Корисниците го прифаќаат видеото бидејќи е лесно за користење и обезбедува широк спектар на релевантни и привлечни содржини. Но, многу традиционални редакции сè уште се вградени во култура базирана на текст и се борат да го прилагодат своето раскажување - вели Њуман.

Во извештајот се истакнува дека поткастот за вести е светла точка за издавачите.

Извештајот откри широк јавен скептицизам за тоа како вештачката интелигенција може да се користи во известувањето, особено за тешки теми како што се политиката или војната.

Извор: BBC
Фото: Pixabay