Пеперутките и молците собираат толку многу статички електрицитет додека летаат, што може да ги повлечат зрната полен од цвеќињата на далечина од неколку милиметри или сантиметри.

Откритието покажува дека со тоа се зголемува нивната ефикасност и ефективност како опрашувачи. Тимот од Универзитетот во Бристол, исто така, забележал дека количината на статички електрицитет што ја носат пеперутките и молците варира помеѓу различни видови и зависи од тоа дали тие слетуваат на цвеќиња, дали се од тропска средина или летаат во текот на денот или ноќта.

Ова е првиот доказ дека количината на статички електрицитет што ја акумулира животното може да биде приспособлива, а со тоа и еволуцијата може да влијае врз неа со природна селекција.

Водечкиот автор д-р Сем Ингланд од Факултетот за биолошки науки во Бристол објаснува:

- Веќе знаеме дека многу животни акумулираат статички електрицитет додека летаат, најверојатно преку триење со воздухот. Исто така, имаше предлози дека овој статички електрицитет може да ја подобри способноста на животните кои слетуваат на цвеќињата, како пчелите и колибрите, да опрашуваат, токму преку привлекување на поленот со помош на електростатско привлекување. Меѓутоа, не беше познато дали оваа идеја се однесува на поширокиот опсег на еднакво важни опрашувачи, како што се пеперутките и молците. Затоа, тргнавме да ја тестираме оваа идеја и да видиме дали пеперутките и молците акумулираат полнеж и дали ова полнење е доволно за да се привлече полен од цвеќињата на нивните тела.

Нивната студија опфатила 269 пеперутки и молци од 11 различни видови, родени на пет различни континенти. Потоа, тие можеле да ги споредат и да видат дали овие еколошки фактори се во корелација со нивното полнење, утврдувајќи дали статичкото полнење е особина на која еволуцијата може да влијае.

-Се развива појасна слика за тоа како влијанието на статичкиот електрицитет во опрашувањето може да биде многу моќно и широко распространето. Со воспоставување на електростатското полнење како особина врз која може да влијае еволуцијата, се отвораат многу прашања за тоа како и зошто природната селекција може да доведе до тоа животните да имаат корист или да страдаат од количината на статички електрицитет што ја акумулираат - додава д-р Ингланд.

Во однос на практичната примена, оваа студија ја отвора вратата за можноста технологиите вештачки да ги зголемат електростатските полнежи или опрашувачите или поленот, со цел да се подобрат стапките на опрашување во природни и земјоделски услови.

- Откривме дека пеперутките и молците акумулираат толку многу статички електрицитет кога летаат, што поленот буквално се влече низ воздухот кон нив додека се приближуваат до цветот. Ова значи дека тие дури и не треба да ги допираат цвеќињата за да ги опрашуваат, што ги прави многу добри во нивната работа како опрашувачи и тоа ни нагласува колку би можеле да бидат важни за функционирањето на нашите цветни екосистеми - заклучил д-р Ингланд.

Извор: phys.org

Фото: Freepik