Поттикнати од интересот на дел од медиумите за објавуваните добивки освојувани на инстант-лотарија од страна на г-ѓа Гурга Георгиева, во текот на последните пет години, а во прилог на точно и комплетно информирање, во согласност со г-ѓа Гурга Георгиева, која е еден од нашите најверни играчи на инстант-лотарија, но една од ретките што ја разбираат потребата од транспарентност, подолу даваме поцелосен осврт.

Г-ѓа Гурга Георгиева во семејството на среќни добитници на нашата инстант-лотарија се придружи од 2014. Со неа и нејзиниот сопруг имавме задоволство да се запознаеме во декември 2014 кога освои една од 10. премии „голф 7“ на инстант-лозот Седма брзина.


Во овие пет години имавме многубројни средби со неа, лично ги посетува речиси сите наши промоции во Струмица и цела источна Македонија и не пропушта да дојде и на поголемите промоции во Скопје. Инстант-лозови, покрај во Ново Село и Струмица, купува и во Штип, Велес, Скопје и во Прилеп каде што оди во посета на кумовите. Во нејзината чанта секогаш има лозови, и кога во болница го чекала породувањето на својата снаа и кога чека по аеродроми, и кога оди на гости. Нејзината пасија кон инстант-лотаријата оди дотаму што порачува по сопругот, пријатели и такси-возачи од Ново Село да ѝ купуваат лозови од различни градови низ нашата земја. Никогаш не купува помалку од 200 лозови дневно и никогаш добивките од по 5.000 денари и помалите не ги зема во пари, туку во лозови. Воедно, не пропушта свадба, или друг позначаен настан без да подари инстант-лозови, кои ги пакува во убави букети. Таа е особено интересен соговорник, самата вели дека не знае колку точно средства инвестира во купување инстант-лозови, но според нејзините кажувања, со инвестициите и добивките е горе-долу на исто. Гурга вели дека инстант-лотаријата ѝ е главна забава и нема ден без да купи лозови, а во гребењето ѝ помагаат и домашните, и пријателите, и соседите.

Ако редовно игра од 2014 година до денес, или 5 години по 365 дена, и купува минимум по 200 лозови дневно, а како што вели таа, некогаш купува и повеќе, не пропуштајќи да купува во недела, може да претпоставиме дека вложува сериозно голема сума парични средства во инстант-лотаријата. Во согласност со политиката за одговорно играње, ова не е наша препорака, но станува збор за нејзин избор.


На реакциите во веб-порталите и на социјалните медиуми за бројот на добивки што ги освојува, таа порачува да инвестираат сите како неа, добивки има за сите.

Откако г-ѓа Гурга се вклучила во нашата инстант-лотарија од 2014 досега имаме близу 30 вида пласирани лозови со вкупен број од 177 премии, од кои 67 возила и 110 парични премии (+ 365 електрични тротинети и 40 смартфони), покрај другите многубројни парични добивки.

Од вкупниот број премии во текот на пет години г-ѓа Гурга освоила вкупно две возила, четири парични премии и еден смартфон. Воедно има освоено и други парични добивки од втора, трета и пониски категории.

Поголеми освоени добивки по хронолошки редослед од 2014 до септември 2019:
На лозот Подарок - прва добивка, во 2014, освои една од 30. премии од 60.000 денари;
На лозот Седма брзина освои едно од 10. возила „голф 7“;
На лозот Среќни коцки освои една од 5те премии од по 1.000.000 денари;
На лозот Детелинка освои една од 20. добивки од по 100.000 денари,
На лозот Дијамант (серија 1 и 2), освои една од 38. добивки од 150.000 денари, една од 45. добивки од 50.000 денари, една од 55. добивки од 10.000 денари
На лозот Златна рипка (серија 1,2, 3, 4 и 5), освои една од 75. добивки од по 50.000.
На инстант-лозот Паркирај Хибрид, освои едно од 10. возилата „тојота аурис хибрид“;
На лозот Среќен роденден освои еден од 40. смартфони;
На лозот Златна треска освои една од 5. премии од 585.000 денари;
На лозот СЕФ (серија 1, 2 и3) освои една од 9. премии од 600.000 денари;

Како што рече самата, најдрага добивка досега и е возилото „тојота аурис хибрид“, а приматот на омилен лоз отсега ќе го има инстант-лозот Аладинова ламба.

На г-ѓа Гурга сме ѝ благодарни што се согласуваше за фотографирање и објава при подигање на добивките, за разлика од многубројни добитници кои не се согласуваат ниту иницијалите да им ги објавиме. Се надеваме дека реакциите на дел од јавноста нема да ја обесхрабрат да се повлече и да бара анонимност.


Како Државна лотарија која е одговорен приредувач на игри на среќа, од исклучителна важност ни е транспарентноста. Игрите на среќа ги приредуваме за да овозможиме забава и добивки за сите што ќе се вклучат во игра. Интензитетот на играње го одредуваат самите играчи, согласно нивните желби и можности. Инстант-лотаријата за г-ѓа Гурга е пред сè начин на забава кој согласно нејзините зборови, секојдневно го практикува, сака и може да си го дозволи, а како што изјави, за неа гребењето има терапевтско дејство.

Г-ѓа Гурга Георгиева е доказ дека кој игра, тој добива.

Подолу даваме осврт за темата инстант-лотарија на Државна лотарија.

Инстант-лотаријата е вид фондовска игра на среќа која нуди можности за освојување добивки, не награди, бидејќи не се работи за наградна игра, туку за игра на среќа во која се обезбедува учество во играта за забава и добивки. Досега пласираните лозови се во вредност од 30 до 80 денари, од кои во фондот за добивки се одвојуваат околу 64%, додека 4% од вредноста на лозот се наменети за инвестирање во републичкиот буџет за општествено корисни цели.

Државна лотарија од почетокот на приредување игри на среќа, од 23 април 2010 година, пласира вкупно 41 серија лозови, од кои 37 серии инстант-лозови, каде што добивката се дознава со гребење и 4 серии експрес лозови, каде што добивката се дознава со кинење.

Ги замолуваме сите наши играчи, меѓу кои и играчите на инстант-лотарија, да се согласуваат на фотографирање и објава, по примерот на г-ѓа Гурга Георгиева, заради транспареноста и негувањето на довербата.