Затоплувањето на морињата во Европа во најголем дел е последица на климатските промени, кои летово доведуваат до зголемување на температурата до 2 Целзиусови степени во Средоземното Море и го прошируваат погоденото подрачје со сериозни последици, особено за морскиот живот, покажа ново истражување на швајцарски научници.

- Од Атлантикот кај брегот на Ирска до Средоземното Море, европските мориња бележат алармантен пораст на температурата, при што во некои подрачја на Средоземното Море температурите летово достигнуваат и до 6 Целзиусови степени над нормалата - вели Томас Фрелифер од Универзитетот во Берн, еден од авторите на истражувањето.

Според него, истражувањето покажува дека зголемувањето е последица на климатските промени, особено на континуираното согорување на фосилните горива.

Со комбинирање податоци од набљудувањата и климатските модели, со цел да ја споредат сегашната клима со хипотетичка клима без затоплување предизвикано од човечката активност, истражувачите од колективот Светска атрибуција на временските услови процениле дека климатските промени додале околу 2 Целзиусови степени на температурите измерени ова лето во Средоземното Море, 1,4 степени во регионот на Пиринејскиот Полуостров и 1,3 степени во келтскиот регион (Ирска и Западна Велика Британија).

Во јули 2026 година светските океани достигнале рекордно високи температури втор месец по ред, според податоците на Европската опсерваторија „Коперник“. Овој феномен бил особено изразен во Европа, нагласуваат истражувачите од Светска атрибуција на временските услови.

Во текот на 14. најтопли денови во 2026 година, затоплувањето во однос на просекот достигнало 3,1 Целзиусови степени во западниот дел на Средоземното Море и 2,6 степени во источниот дел на Средоземното Море, во споредба со 1,5 степен во регионот на Пиринејскиот Полуостров и 1,2 степени во келтскиот регион.

Под влијание на климатските промени, морските топлотни бранови се прошириле и низ европските мориња.

Затоплувањето на морињата ја зголемува температурата на воздухот и влажноста по должината на бреговите, што ги влошува ноќните температури и топлотниот стрес.

- Морските и копнените топлотни бранови се поврзани и можат меѓусебно да се засилуваат. Тоа се две страни на иста паричка - се наведува во истражувањето.

Затоплувањето на морињата може да влоши одредени екстремни временски настани, особено обилните врнежи, бидејќи го зголемува испарувањето, а со тоа и влажноста на атмосферата.

Додека потоплите води можат да изгледаат пријатно за капење во постудените земји, последиците за морскиот живот се многу позагрижувачки.

Затоплувањето на морињата може да предизвика масовно исчезнување на коралите, сунѓерите и алгите, да ги наруши синџирите на исхрана и да го намали бројот на морските птици и цицачи, а и да има лоши економски последици за риболовот, аквакултурата и туризмот.

Извор: Nova.rs
Фото: Magnific