Советот на Европската Унија и Европскиот парламент синоќа постигнаа договор за закон со кој се предвидува крај на продажбата на нови автомобили и возила со мотор со внатрешно согорување, т.е. бензин и дизел, од 2035 година.

- Овој договор го отвора патот за современа и конкурентна автомобилска индустрија во ЕУ. Светот се менува и ние мора да останеме лидери во иновациите - изјави чешкиот министер за индустрија и трговија, Јозеф Сикела.

Чешкото претседателство преговараше во име на 27. земји членки на ЕУ со претставниците на ЕП. Постигнат е договор за намалување на испуштањето на јаглероден диоксид од новите автомобили за 55 отсто и 50 отсто за камиони до 2030, во споредба со нивото од 2021 година. Според тоа, до 2035 година треба да се постигнат нула емисии и за новите автомобили и за камионите.