Квартот на гејшите во Кјото му покажува на светот безиразно лице: бескрајни редови стари дрвени фасади, мали двокатници на кои сенката од бамбусите им ги затскрива прозорците, оневозможувајќи поглед внатре.


Модерната гејша е крем на големата индустрија која со векови се развивала за да им угоди на сензуалните желби на Јапонците. Но, таа не е проститутка. Ако има односи, тоа е по нејзина желба или како дел од траен однос. Нејзината работа е да им продава сон - за раскошот, романтиката и ексклузивноста - на најбогатите и најмоќните Јапонци. Во најскапите ресторани и куќи за чај, додека мажите водат сериозни деловни преговори, гејшите точат саке и го одржуваат разговорот - по цена од неколку илјади долари.


Во општеството во кое на жената местото ѝ било или во домот или во бордел, гејшите избрале одделно катче, создавајќи заедница на жени позната како „светот на цвеќињата и врбите“. Тие се облекувале во раскошни свилени кимона и се стремеле кон совршенство во шминкањето и отменото однесување. На врвот од популарноста, во 19 век, тие ја диктирале модата и популарната култура, биле супермодели на тоа време. Но, како што западната култура се ширела во повоена Јапонија, гејшите застанале во времето, правејќи ја традицијата дел од својата привлечност.