Голем број фалени и обожавани серии се токму оние во кои има сложени и несовршени ликови чиј морал често се доведува во прашање.

Иако во суштина станува збор за негативци, овие ликови им станаа омилени на многу гледачи, кои преку дејството на серијата се поврзаа со нивните приказни и почнаа да сочувствуваат со нивните постапки и она што го чувствуваат.

Подолу издвојуваме неколку познати телевизиски серии во кои главните ликови беа негативци, но тоа не нѐ спречи да навиваме за нив.

Волтер Вајт - „Да станеш лош“



„Да станеш лош“ е една од најпознатите серии, а главниот негативец чија приказна ја следиме низ пет сезони е Волтер Вајт (Брајан Кренстон). Вајт е лик чиј морал секоја сезона сѐ повеќе опаѓа. Тој е многу амбициозен и огорчен за пропуштените можности во животот, поради што мора да работи работа за која е преквалификуван. Епизодите на почетокот на неговата приказна покажуваат дека Вајт наоѓа чудна возбуда во светот на опасните дроги, што ќе прерасне во негова цел да владее со целата мет-империја.

Рејмонд Редингтон - „Црната листа“



Џејмс Спејдер го играше еден од најкомплексните и најпаметни негативци и криминалци на сите времиња, Рејмонд Редингтон, во криминалната серија „Црната листа“. Редингтон е најбараниот криминалец на листата на ФБИ, а кога ќе понуди да му помогне на ФБИ да ги фати лошите криминалци во замена за слобода, се откриваат неверојатни настани и тајни кои многумина ги чинеа живот.

Излегува дека Рејмонд е секогаш неколку чекори понапред од сите, речиси е невозможно да се предвидат неговите планови и тој да се фати на дело. Гледачите не можат, а да не бидат маѓепсани од неговата интелигенција, сомнителен морал и задни намери.

Норман Бејтс - „Бејтс мотел“



Серијата „Бејтс мотел“ ја следи приказната за Норман Бејтс (Фреди Хајмор). Станува збор за современ претходник и адаптација на филмот „Психопат“ и го прикажува животот на Норман како млад човек и неговата токсична врска со неговата мајка Норма, која е клучен дел од неговиот лик во филмот на Алфред Хичкок. Иако Норман има пристојно алтер его, многу е јасно дека личноста на убиецот веќе се формира поради сето она што се случило во мотелот „Бејтс“. Младиот Норман има дисоцијативно нарушување на идентитетот, а неговото убиствено алтер его станува подоминантно со секоја сезона. Поради тоа, убил неколку луѓе, меѓу кои и сопствената мајка.

Тони Сопрано - „Сопранови“



Серијата „Сопранови“ е во голема мера одговорна за создавањето антихеројски протагонисти. Главниот лик на серијата, Тони Сопрано (Џејмс Гандолфини), е глава на криминалното семејство Димео, кое во текот на сезоните врши различни криминални дејствија. Иако Тони се обидува да стане подобра личност, тој двапати ја напушта терапијата бидејќи не верува дека тоа му помага.

Некои од најлошите работи што ги направил се постојано изневерување и лажење на својата сопруга, финансиско уништување на животите на луѓето и наредување убиство или лично убивање на други ликови во серијата. Крајот на „Сопранови“ само докажа дека Тони никогаш не можеше навистина да се извлече од она што го правеше.

Декстер Морган - „Декстер“



Криминалистичката серија „Декстер“ го следи форензичарот Декстер Морган (Мајкл С. Хол), кој живее двоен живот и ги лаже сите околу него. Иако преку ден работи како форензички техничар за анализа на крв во полициска станица во Мајами, навечер станува психопат и сериски убиец. Декстер има личен кодекс што му налага да убива други убијци. Сепак, многу пати во текот на серијата тој го прекршува кодексот по кој се води.

Извор: Index.hr
Фото: Screenshot/YouTube