Германски јутјубер го претвори легендарниот дизајн на „голф“ од втората генерација во напредна автономна косилка која го воодушеви и „Фолксваген“

Воден од страста кон „голф 2“ на неговиот татко, германскиот јутубер Нилс од каналот „Проџект хантер“ одлучи да изгради автономна роботска косилка од нула. Својата креација ја облече во препознатливото руво на класичниот спортски компакт од осумдесеттите години, создавајќи уред кој привлекува погледи, но и беспрекорно си ја врши работата на тревникот.

Оваа единствена конструкција е обвиена во каросериски панели изработени со помош на 3Д-печатач, кои совршено го имитираат дизајнот на втората генерација на „голф“. Според наводите од порталот „Карскупс“, за изработка на целата каросерија биле потребни повеќе од сто часа активно печатење, а резултатот е навистина импресивен.

Под оваа препознатлива надворешност инспирирана од моделот ГТИ се крие цврста алуминиумска рамка и целата потребна опрема за косење трева и откривање пречки. Хаубата се отвора и овозможува едноставен пристап до механизмот за косење. За придвижување на сечилото, Нилс искористил мотор без четкички каков што инаку се користи за дронови. Тој придвижува навојна шипка низ двојни лежишта за да го напојува дискот за сечење на кој може да му се приспособува висината. Иако механизмот за сечење сам по себе одлично си ја врши работата, најинтересниот дел од целиот проект е всушност напредната автономна функција.