Дирекцијата за заштита на лични податоци (ДЗЛП) информира дека се забележува зголемена активност на организирање лажни наградни игри преку социјалните мрежи. Притоа, велат од Дирекцијата, на граѓаните им се ветуваат различни видови награди, а за возврат од нив се бара да ги откријат своите лични податоци, како што се име и презиме, адреса, фотографија, број на лична карта, матичен број, податоци од платежни картички, како и копии од лични документи.

Дирекцијата советува граѓаните да бидат исклучително внимателни при откривањето на своите лични податоци на интернет затоа што постои зголемен ризик да бидат злоупотребени за други незаконски цели.

- Апелираме граѓаните да бидат внимателни и да не ги доставуваат своите лични податоци преку интернет на непознати или недоволно познати лица без да проверат дали објавената информација за наградна игра е точна. Во овој контекст истакнуваме дека во вакви случаи најчесто се користат техники на компјутерски базиран социјален инженеринг, како што се „phishing“ и „pharming“. Овие облици на измама опфаќаат збир на активности од неовластени испраќачи, преку користење лажни пораки од е-пошта или користење лажни веб-страници, обидувајќи се притоа од корисниците да добијат доверливи лични податоци - потенцираат од Дирекцијата.

За жал, додаваат, голем е бројот на корисници што не се запознаени со овој вид измами, при што доколку натрапниците еднаш дојдат до доверливите податоци, тие или сами ги користат за одредени, најчесто незаконски цели или ги продаваат.

- Во пораките најчесто се повикуваат на лажни веб-страници, кои според изгледот целосно одговараат на веб-страниците на легитимните компании (фирми). Оттука, апелираме при однесувањето на интернет сите граѓани да постапуваат со соодветно зголемено внимание и да направат целосна проверка пред да се одлучат да откриваат лични и други податоци - појаснуваат од Дирекцијата.

Извор: МИА