1.000 долари за гледање на сите филмови „Џејмс Бонд“

Можеби Џејмс Бонд може да преживее многу ситуации, но една работа што не е во можност да ја контролира е светската пандемија, која постојано ги одложува премиерите на филмовите, па така беше одложено и 25. продолжение „Не е време за умирање“ (No Time To Die).

Премиерата на филмот првично беше закажана за април минатата година, но беше одложена за два различни датуми во ноември, а потоа и за овој април. Но, сега е закажана за 8 октомври, околу 18 месеци по првичниот датум.

За да се промовира долгоочекуваниот филм, веб-страницата „Nerd Bear“ бара еден супер обожавател на филмовите на Џејмс Бонд кој може да заработи 1.000 денари гледајќи ги сите 24 филма, или како што вели веб-страницата, уживање во 51 час филмови, седум различни 007 агенти и многу мартини.

Компанијата бара некој на кој ќе му ја додели работата од соништата и некој што ја сака франшизата и има добро чувство за детали, заедно со активно следење на социјалните мрежи.

Кандидатите треба да бидат државјани на САД или постојани жители таму и да имаат најмалку 18 години. Исто така, треба да бидат во можност да ги изгледаат сите 24 филма за 30 дена.

Победникот ќе добие картичка со 1.000 долари од „Амазон“ за изнајмување филмови од „Амазон прајм“. Исто така, неговото искуство ќе треба да го сподели на социјалните мрежи и да пополни едноставен извештај. Освен 1.000 долари, победникот ќе добие и картичка со 50 долари од Еј-ем-си за да може да го гледа најновото продолжение.

За да се пријават, обожавателите треба да ја пополнат оваа апликација, вклучувајќи избор на омилениот Џејмс Бонд-филм, како и да одговори на овие прашања: „Што ве прави најдобар обожавател на Џејмс Бонд?“ и „Зошто треба да те избереме тебе за оваа работа?“. Апликациите можат да се доставуваат до 16 април 2021 година.

Ова не е првпат компаниите да им нудат можност за заработка на обожавателите додека ги гледаат омилените филмови. За време на пандемијата, „Емпајр Каверс“ го направи истото со класичните филмови за патувања, „Кејбл ти-ви“ и неколку други веб-страници со хорор-филмови, а „И-ди смарт“ со филмовите за Хари Потер.