Инфлацијата мерена преку индексот на трошоците за живот во мај во споредба со април е зголемена за 0,9 проценти, објави денеска Државниот завод за статистика.
Зголемувањето се должи на покачувањето на трошоците за живот во делот ресторани и хотели за 3,1 проценти, рекреација и култура за 2,1 проценти, транспорт за 1,9 проценти, облека и обувки за 1,5 процент, мебел, покуќнина и одржување на домаќинствата за 1 процент, храна и безалкохолни пијалаци за 0,7 проценти, разновидни стоки и услуги за 0,4 проценти, домување, вода, електрика, гас и други горива, здравје за 0,1 проценти.
Намалување на трошоците за живот е забележано во групата комуникации за 0,3 проценти, а на исто ниво остануваат трошоците за живот во делот алкохолни пијалаци, тутун и наркотици и образование.
Во споредба со мај минатата година, се бележи зголемување од 4,5 проценти.
Цените на мало во мај во споредба со април бележат зголемување од 1,3 проценти, а во споредба со мај лани зголемување од 5,8 проценти.
Извор: МИА