Активистите на движењето „Екстинкшен рибелион“ (Extinction Rebellion) ги блокираа главните улици на Берлин, Амстердам и на Лондон на почетокот од серијата протести со кои се бара нова политика за заштита на климата.

Околу илјада луѓе ја блокираа крстосницата во близина на Тиргартен паркот во Берлин, каде што се наоѓа Споменикот на победата.

Членови на движењето „Екстинкшен рибелион“ (Бунт против изумирањето) исто така поставија камп пред просториите на канцеларката Ангела Меркел во знак на протест поради подготвениот пакет мерки за борба против климатските промени.

Во Амстердам стотина демонстранти ја блокираа главната улица пред Ријксмузеј, една од најпопуларните туристички дестинации, и поставија шатори. Протестот се одржува и покрај забраната од градските власти.

Активистите ги блокираа и главните улици во Лондон, меѓу кои и улицата што води од Парламентот до Бакингемската палата. Британската полиција денеска превентивно уапси 10 активисти под сомнение дека го загрозуваат јавниот ред.

Екологистите во Франција ги блокираа влезовите во трговските центри „симболот на капитализмот“, прогласувајќи ја операцијата за „последна окупација пред крајот на светот“.

Протести денеска се одржаа и во Австралија и во Нов Зеланд. Во Сиднеј полицијата уапси 30 демонстранти зашто одбиваа да се симнат од патот кај главната железничка станица, јави ДПА. Слични, но мирни протести се одржаа во Мелбурн и во Бризбејн.

Триесет активисти се уапсени и во главниот град на Нов Зеланд, Велингтон, каде што стотици луѓе блокираа големи патишта, министерства, па дури и влегоа во банката АНЗ за да им порачаат да се откажат од поддршката за фосилни горива.

Протести се најавени и се одржуваат во Аргентина, Шпанија, САД, Ирска, Индија и во Јужна Африка.