Американската компанија „Беркшир хатавеј травел протекшн“ (Berkshire Hathaway Travel Protection) ја претстави листата со најбезбедни земји за патување во 2023 година. Од вкупно 15 држави, 11 се во Европа, а Холандија го има првото место.
Неколку фактори придонесуваат за рангирањето, вклучително и резултатите од анкета врз луѓе кои ги посетиле тие места, Глобалниот индекс на мирот (ГПИ), најновите совети за патување на американскиот Стејт департмент и резултатите од „Геошур глобал“ (GeoSure Global), кои комбинираат криминал, здравје и предупредувања за патување во големите градови. Сепак, некои земји, како Финска, не се вклучени во анализата.
Европските 11 земји што влегоа во топ-15 листата се: Белгија, Велика Британија, Ирска, Шпанија, Швајцарија, Шведска, Германија, Норвешка, Исланд, Данска и Холандија. Надвор од Европа, на листата со најбезбедни се најдоа и Австралија, Канада, Нов Зеланд и Обединетите Арапски Емирати.
Белгија се наоѓа на 15. место на општата листа на „Беркшир“ и на 22. место на ГПИ. Најголемата закана во оваа состојба може да биде внесот на калории. Стејт департментот на САД ја рангира земјата во категоријата на ниво 2 советувајќи ги патниците, сепак, да бидат внимателни поради мала можност за закана од тероризам.
Велика Британија е 14. најбезбедна земја во светот, во споредба со местото бр. 18 лани, а е 34. на ГПИ и е во категоријата на ниво 2 на САД.
Ирска е на 12. место на општата листа, трета на ГПИ и е во категоријата на ниво 1 во САД.
Шпанија се најде на 11. место на „Беркшир“ списокот и е во топ-30 на ГПИ. Стејт департментот ја класифицира во категорија на ниво 2.
Швајцарија се наоѓа на деветтото место на „Беркшир“ листата, на 11. на ГПИ и е во најниската категорија на американскиот Стејт департмент, ниво 1.
Шведска годинава е на осмото место во генералниот пласман на „Беркшир“, по четвртото место во 2022 година.
Германија е седма на листата – скок од деветтото место лани. САД ѝ доделија ниво 2 поради можна терористичка закана. Норвешка е на петтото место. Исланд го зазеде третото место на списокот со најбезбедни места за патување во 2023 година, за разлика од првото место лани. И покрај малиот пад, северноевропската земја сè уште е рангирана како најмирна земја во светот според ГПИ, како и најниско ниво 1 на опасност, според САД.
Данска е на второто место според „Беркшир“. Освен тоа, Копенхаген е на врвот на Индексот на безбедни градови за 2021 година.
Холандија годинава е рангирана на прво место на листата на најбезбедни земји на „Беркшир“ и на 21 место на ГПИ. Американските патници кои беа анкетирани го препознаа Амстердам како еден од најбезбедните градови во светот. Стејт департментот на САД ја стави категоријата на ниво 2 за патување, поради извесна мала закана од тероризам.
Извор: МИА