Оваа едногласна одлука на ФКК се однесува на т.н. „робоповици“ засновани на ВИ за пресоздавање гласови од познати или непознати личности. Според Законот, телефонските оператори не смеат да користат автоматизирани системи, ниту вештачки создадени или претходно снимени гласовни пораки за да контактираат со потрошувачите преку мобилни телефони, ниту пак, преку фиксни телефони, освен ако прво не добијат писмена согласност од потрошувачот за таков повик. Претседателката на ФКК, Џесика Розенворсел, изјави дека „лошите момци“ веќе користат ВИ и „робоповици“ за да се претставуваат како познати луѓе, да изнудат пари и корист од некого или, пак, за дезинформирање на гласачите.

- Ова изгледа како нешто од далечната иднина, но заканата е веќе тука... Сите ние може да бидеме цел на овие лажни повици, па почувствувавме дека е време за акција - сега и веднаш!, изјави Розенворсел.

Максималната казна за прекршител е 23.000 долари по повик. На примачот на лажниот повик кој иницира спор му е дозволена отштета до 1.500 долари за секој несакан повик.

Одлуката доаѓа откако властите во американската сојузна држава Њу Хемпшир спроведуваат интензивна истрага за случајот со „роботски повици“ со имитирање на гласот на американскиот претседател Џо Бајден, кои имале цел да се одвратат луѓето од учество на прелиминарните избори на Демократската партија за утврдување кандидат за претседател на САД во 2024 година.

Одлуката ќе стапи во сила веднаш и ФКК ќе може да ги казнува лицата и компаниите кои користат гласови генерирани со ВИ и да ги блокираат таквите повици.