Јапонија пронајде идеална локација за отворање комерцијален подводен рудник за злато, но самата помисла на тоа поттикнува жестока расправа. Во потонат вулкански кратер покрај југоисточниот брег на Јапонија истражувачите открија активни хидротермални извори, таканаречени црни оџаци, кои исфрлаат огромни количества злато. Концентрациите пронајдени на ова место се највисоките некогаш забележани во светот, пишува „Сајенс алерт“.

Откритие во подводен вулкан

Освен ситните, видливи зрнца од благородниот метал, овие извори создаваат и таканаречено „невидливо злато“, кое не може да се види со голо око, ниту со стандарден микроскоп бидејќи е вградено во други материјали од морското дно.

Ова откритие е објавено во списанието „Сајентифик рипортс“ по само неколку месеци откако меѓународен тим на научници предупреди дека активните хидротермални извори треба да се заштитат од комерцијалните рударски интереси.

Хидротермалните извори Хигаши-Аогашима беа откриени уште во 2015 година во рамките на јапонската ексклузивна економска зона. До денес е непознато колку е богат морскиот свет што го поддржуваат овие извори, но затоа сега е многу појасно колку злато содржат.

Анализа на „златото за будали“

Истражувачите од универзитетите Шизуока, Васеда и Универзитетот во Токио ги анализираа примероците од карпи од хидротермалните полиња лоцирани околу 350 километри јужно од Токио. Користејќи ја исклучително чувствителната метода на спектрометрија на маси на секундарни јони (СИМС / SIMS), тие пронајдоа скриени наоѓалишта на злато со „исклучително висока чистота“.

Овие невидливи наночестички се скриени во пиритот, сулфиден минерал кој поради својот сјај, го носи прекарот „злато за будали“. Но, се покажа дека во ова лажно злато цело време се криело вистинското.

Златото може да биде заробено во пиритот како наночестички или како поединечни атоми вградени во самата хемиска структура на минералот, а на ова наоѓалиште се присутни двете форми. Авторите на студијата заклучуваат дека пиритот на овој локалитет се одликува со најголема концентрација на злато во светот.

Рудник за злато на дното на морето?

Покрај рекордната концентрација, наоѓалиштото Хигаши-Аогашима е привлечно за идно рударење и поради релативно малата длабочина во споредба со другите потенцијални локации што ги разгледува Јапонија. Поради пристапноста и високата вредност, ова место се наметнува како исклучително примамлив кандидат за иден рудник.

Денес во светот не постои ниту еден функционален комерцијален рудник за злато на океанското дно. Научниците сè уште се обидуваат да развијат евтин и ефикасен начин за издвојување на „невидливото злато“ од материјалите од морското дно. Претходниот обид за воспоставување подводен рудник покрај брегот на Папуа Нова Гвинеја пропадна поради финансиските проблеми на компанијата и протестите на еколошките активисти, а островската држава притоа наводно изгубила околу 85 милиони американски долари.

Јапонија истражува и покрај мораториумот