Шпанското студио „РЦР архитектс“, добитник на Прицкеровата награда за архитектура за 2017 година, го откри својот дизајн за облакодерот „Мураба Веил“, планиран за во центарот на Дубаи. Со висина од 380 метри, оваа градба е специфична по тоа што ќе биде широка колку еден стан.

Зградата се наоѓа веднаш до главниот автопат во Дубаи и каналот Дубаи, а архитектонскиот тим ја опишал градбата како „невообичаено тесен“ облакодер, бидејќи фасадата ќе има ширина од само 22,5 метри. Идејата е дека на овој начин зградата се издвојува меѓу многуте величествени градби на оваа светска метропола.

- Импозантна, но суптилна, „Мураба Веил“ се издигнува од дините над најкосмополитскиот и футуристички град на Обединетите Арапски Емирати, претставувајќи храбра, спектакуларна визија што ќе ве натера да сопрете додека одите - рекле шпанските архитекти.

Таквата структура, чии необично тесни профили и распореди можат да се постигнат само со најнов дизајн, сепак е инспирирана од домашната архитектура која датира со векови, стремејќи се да ги задоволи основните човечки потреби за засолниште, безбедност, приватност и блиска врска со природата. Облакодерот ќе има 73 ката и ќе содржи 131 стан, така што секој ќе се простира на ширината на зградата, овозможувајќи поглед од внатрешноста во двете насоки.

фото извор: RCR Arquitectes

Освен апартманите, „Мураба Веил“ ќе има и спа-центар, ресторан, уметничка галерија, терен за падел, сали за состаноци, приватно кино и заеднички простор што ќе потсетува на песочни дини. Целата зграда ќе биде обвиткана во мрежа од не'рѓосувачки челик, а според тимот, дизајнот на становите е инспириран од типични локални куќи.

- Сакаме нашите згради да бидат во хармонија со местото, да припаѓаат на локацијата и домашниот пејзаж во кој се наоѓаат. Тие мора да комуницираат со природата и да бидат проткаени со атмосферата на локалната култура - изјавил основачот на „РЦР архитектс“, Рафаел Аранда.

Извор: gradnja.rs

Фото: RCR Arquitectes