ИКЕА се движи над границите на еко-пријателски дом за да работи на одржливо урбано живеење. Сега компанијата соработува со општината Хелсингборг во Шведска на проект за зелена заедница, познат како „Х22“, во кој се вклучени земјоделството, малопродажбата и домувањето. Се планираат места во и околу градот во рамките на подготовките за 35-дневниот саем што ќе почне во 2022 година.

Во предградието Дротнингхог, ИКЕА ќе помогне да се воспостави пазар за урбани земјоделски култури со цел да се зголемат квалификациите на жителите и да се создадат нови работни места и бизниси. Почнувајќи од оваа година, свежите култури ќе се одгледуваат на локалитетот наречен „Градината“. Производот потоа ќе биде претворен во локални оброци во „Кујната“, а сите производи ќе се продаваат на „Пазар“.


Различните страни на саемот ќе ги поврзе градската шума Фредриксдалскоскоген. ИКЕА ќе создаде простор за кампување на отворено со користење одржливи материјали и самостојна енергија и систем за вода. Студенти од целиот свет ќе бидат поканети во областа за да дизајнираат нови решенија за станови и комунални услуги.

За да помогне во промовирање на проектот, ИКЕА ќе лансира серијал-поткаст наречен „Оракл“, во кој локалните жители ќе ги споделуваат своите приказни за иднината на градот низ неколку епизоди што ќе траат по еден час.

„Х22“ го означува најновиот обид на ИКЕА да донесе повеќе еколошки политики. Компанијата претходно вети дека ќе биде климатски-позитивна до 2030 година, почнувајќи со целта да генерира повеќе обновлива енергија од енергијата што се користи во нејзините продавници. Исто така, компанијата вети дека ќе престане со продажба на алкални батерии што не се полнат до октомври 2021 година поради загриженоста за отпадот и одржливоста.

Извор: Engadget.com
Фото: IKEA/h22