Во Велика Британија фокусот на Неделата на менталното здравје е движењето. Има многу здравствени придобивки од дополнителното движење, вклучувајќи ги и секојдневните активности, на пример, одењето. Повеќето луѓе едноставно не пешачат доволно - и генерално, колку повеќе пешачите, толку подобро за вашето целокупно здравје.
Според Светската здравствена организација, недостигот на физичка активност е четврта најчеста причина за смрт во светот. Откриено е дека се потребни само 4.000 чекори дневно за да се намалат смртните случаи од која било причина, а уште помалку чекори се потребни за да се намалат смртните случаи од кардиоваскуларни болести.
Но, и менталното здравје се подобрува со пешачењето. Во истражувањето, одењето е поврзано со подобрена ментална јасност и креативен проток на идеи. Истражувањата посочуваат дека правењето 9.800 чекори на дневна основа може да го намали ризикот од деменција за 50 проценти.
Шопингот можеби не е првото нешто што ви паѓа на ум кога размислувате за пешачење, но можеби треба да ви биде.
Дали шопингот може да ве одржува во добра форма?
Во минатото имало многу процени за тоа колку пешачат луѓето додека се во шопинг. Некои трговски центри процениле дека луѓето пешачат околу 7 милји при дадена посета, а со едночасовното патување до супермаркет може да направат дури 4.000 чекори. Тоа е, во просек, еквивалент на согорување околу 150 калории.
Пред пандемијата на ковид-19 просечниот светски дневен број на чекори беше 5.324. Сосема очекувано, пандемијата резултира со намалени нивоа на физичка активност и допрва треба да се врати на нивоата од пред пандемијата.
До одреден степен, ова може да биде поврзано со фактот дека онлајн купувањето значително се зголеми за време на пандемијата. Но, порастот на онлајн купувањето значи дека луѓето се движат помалку во споредба со она што би го направиле доколку ги посетат продавниците лично. Во моментов има околу пет милијарди интернет-корисници во светот, а таа бројка рапидно се зголемува. Со тоа се зголемува и бројот на луѓе што купуваат преку интернет. Оваа година се проценува дека околу 6,3 трилиони долари ќе бидат потрошени за купување преку интернет. Со ова зголемување веројатно ќе се намали и бројот на чекори што ги прават луѓето.
Физичкото купување го олеснува правењето дополнителни чекори
За многумина, да се биде активен може да изгледа застрашувачки, особено ако тоа не го правеле некое време. Додајте ги зафатените распореди од секојдневието во равенката и лесно е да се види зошто луѓето го одложуваат тоа како активност.
Сепак, преминот од онлајн купување во физичко купување е релативно лесен. Не бара некоја специфична опрема, членства или обука, и генерално не чини повеќе од она што би го потрошиле на интернет. (Можете дури и да заштедите на трошоците за испорака!)
Во САД, шетањето по трговски центри дури се промовира како добра активност за да останете во добра форма. Ова е особено погодно за луѓе на кои може да им биде тешко да одат по нерамни површини, за оние што се загрижени за безбедноста при одење на друго место или за оние на кои им треба пристап до јавни тоалети. Сите овие аспекти се разгледуваат кога се работи за прошетка во трговски центар и затоа тоа може да им помогне на неактивните возрасни личности безбедно да започнат програма за пешачење.
Иако можеби е покорисно да се пешачи на отворено, шетањето во трговски центар сепак може да понуди здравствени придобивки, едноставно затоа што им овозможува на луѓето да се движат. Меѓутоа, за оние што се во можност, купувањето на отворено може да биде уште покорисно за здравјето.
Следниот пат кога ќе ви треба нешто, наместо да посегнете по компјутерот, размислете да станете и да одите во продавница.
Извор: Psychology Today
Фото: Freepik