Предавањето се одржа со учество на студенти од завршната година на додипломски студии како дел од нивниот модул „Безбедност и интеграција во Нова Европа“. „Бидејќи дел од модулот и неговото оценување се однесуваат на процесот и проблемите поврзани со односите на Европската Унија со земјите од Западен Балкан и поранешниот Советски Сојуз, експертските анализи и „инсајдерски“ сведоштва на професорката Костоска и д-р Калитчак беа од непроценливо значење“, истакна организаторот на гостувачките предавања, Мартин Дејнџерфилд, професор по европска интеграција и Jean Monnet Chair за европска интеграција на Централна и Источна Европа. Професорот Дејнџерфилд потенцира дека оваа иницијатива е реализирана како резултат на претходно воспоставената соработка со двајцата визитинг-професори во рамките на различните високообразовни програми на Европската Унија. Таа претставува перфектна илустрација за неоспорната вредност на академската соработка со европските партнери и клучната важност за изнаоѓање нови начини за одржување и проширување на овие релации во епохата на постбрегзит.

 

Поканата за онлајн-гостувачко предавање до професорката Оливера Костоска беше испратена непосредно по блокадата од страна на Бугарија за официјално започнување на пристапните преговори на нашата земја со Европската Унија. Имајќи го предвид одлагањето на одлуката за започнување на пристапните преговори во јуни 2019 година и последователното вето на Франција во октомври истата година, поголемиот дел од нејзината презентација, насловена како „Играта е повторно во тек“ во духот на стиховите од познатиот хит на шведската поп-група ABBA, беше посветен на бугарското „не“ за отпочнување на преговорите и „условите“ кои Бугарија ги испорача за одблокирање на европскиот пат на нашата земја. Патем, во предавањето беше направен детален осврт на динамиката во односите на нашата држава со Европската Унија, „проблемот со името“, руската интерференција во регионот на Западен Балкан и иницијативата „Еден појас, еден пат“, како енормно амбициозна развојна кампања преку која Кина сака да ја стимулира трговијата и економскиот раст, главно преку изградба на инфраструктура низ Африка, Азија и Европа... „Кина станува политичка и нормативна закана за позицијата на ЕУ во Западен Балкан – сè додека блокот не е во состојба или не е подготвен да ги интегрира овие земји, тие ќе бидат поттикнати да формираат поблиски врски со Кина, која својата финансиска помош, во споредба со стриктната кондиционалност на Европската Унија, ја нуди на прилично безусловен начин“. Фасцинантни беа прашањата и дискусиите кои последователно беа развиени од страна на британските студенти, кои изразија желба токму оваа тематика да ја вклучат во истражувањата кои се спроведуваат на нивниот универзитет.