Иако стомачните често се поврзуваат со професионални спортисти и луѓе кои голем дел од времето го поминуваат во фитнес-сала, експертите се согласуваат дека ова е вежба што речиси секој може да ја изведува без оглед на годините. Редовното правење стомачни е важно за зајакнување на мускулите на трупот, кои нè држат исправени, го штитат нашиот 'рбет и влијаат врз правилното држење на телото.

Силното тело ни помага полесно да се справиме со природното трошење на 'рбетот со текот на годините, но и да го намалиме ризикот од падови бидејќи речиси секое наше движење, од седење, станување до одење, ги активира овие мускули.

Силен стомак не значи само видливи „плочки“, туку ги вклучува и длабоките мускули на 'рбетот, колковите, карлицата, грбот и дијафрагмата, целокупниот извор на сила на нашето тело.

- Вашиот труп не работи изолирано. Тој функционира како интегриран стабилизациски систем за целото тело за време на движење во реални ситуации - објаснува физиотерапевтот Нел Мид.

Колку стомачни се доволни за вашата возраст?

Според физиологот Ник Швандт, специјализиран за хронични состојби и болка, лицата на возраст од 30 до 49 години треба да можат да направат околу 40 стомачни, два до три пати неделно.

Со годините бројот се намалува:

од 50 до 59 години - околу 20 повторувања
од 60 до 69 години - околу 10 стомачни

- Ова се само параметри кон кои треба да се стремиме. Но под услов техниката да биде правилна и кондицијата на разумно ниво - вели Швандт и додава интересна споредба.

- Мајк Тајсон има 59 години, но веројатно може да направи повеќе стомачни од повеќето 29-годишници.

Квалитет пред квантитет

- Не трошете енергија на бескрајни серии исти стомачни. Вклучете што повеќе варијации што го активираат телото од различни агли и ги вклучуваат длабоките мускули што спирално се обвиткуваат околу центарот на телото - вели Симпкинс.

Секојдневните движења, од одење до вадење садови од машината, вклучуваат ротација на телото, па затоа е важно да се зајакнат и косите стомачни мускули за да се заштити 'рбетот.

Како правилно да направите стомачни?

За почетниците, најважна е формата. Целта на стомачните е контролирана флексија на 'рбетот, а не целосно седнување.

Основна форма - легнете на грб на цврста подлога, со свиткани колена и стапала рамно на подот во ширина на колковите. Рацете ставете ги зад главата (без влечење) или прекрстете ги на градите. Вдишете и активирајте ги стомачните мускули. Издишете и подигнете ги главата, рамената и горниот дел од грбот, фокусирајќи се на контракцијата. Задржете една секунда и полека вратете се долу.

Извор: Citymagazine.danas.rs
Фото: Freepik