Пандемијата на ковид-19 најверојатно ќе стане епидемија есенва и може да се очекува да се повторува секоја година, но да биде контролирана од бустери за вакцини, вели водечки германски вирусолог.

Кристијан Достен изјави дека верува дека бројот на случаи со ковид-19 ќе се зголеми наесен, но дека болеста ќе може да се контролира. Иако порастот веројатно ќе се опише како „четврти бран“, голема е веројатноста тоа да го означи почетокот на „нова, ендемична фаза“ или „сезонска епидемија“ што ќе се повтори за неколку години, но може да се задржи под контрола со надополнувањето на вакцините.

Достен, раководител на одделот за вирусологија на универзитетската болница во Берлин, кој бил клучен и постојан глас што ги советувал креаторите на владата и јавното здравство во текот на целата пандемија, рече дека и покрај јасните индикации, вирусот сѐ повеќе се контролира, но постои опасност да биде поткопан од луѓе кои не ја добиле втората доза од вакцината или веруваат дека вакцините веќе не се потребни.

- Во моментов се наоѓаме во фаза на транзиција. Следната цел што треба да ја имаме како општество е 80 отсто од населението да биде целосно вакцинирано - вели Достен.

Тој додаде дека сите очекувања се дека Германија треба да ја достигне таа цел до крајот на август или средината на септември. Во моментов 23 отсто примиле целосна вакцина, а 47 отсто само една доза.


Достен рече дека клучните теми на дискусија во текот на следните месеци ќе бидат вакцинирање на децата и процена колку брзо оние што биле вакцинирани го губат имунитетот.

- Веројатно постарите луѓе, кои и онака не реагираат толку силно на вакцината, ќе покажат јасно губење на имунитетот по половина или цела година, додека кај младите помала е веројатноста да се случи тоа - рече тој.

Наесен тој очекува да види „сè поконкурентна слика за варијанти кои ќе му бегаат на имунитетот, бидејќи имунитетниот статус на населението ќе биде похетероген“. Во моментов сите погледи се свртени кон варијантата делта, прва откриена во Индија, која брзо се шири низ Велика Британија, но која во моментов сочинува само околу 2 отсто од новите случаи во Германија.

Достен вели дека очекува тоа да стане поизразено во Германија во текот на следните неколку недели, но не мора да биде доминантно како што е во Велика Британија.

Неговата најголема грижа е немањето интерес кај Германците да се вакцинираат и рече дека ќе треба да се направат нови обиди да се мотивираат луѓето.

- Имаме некои групи кои сè уште не биле вакцинирани, имаме и такви што еднаш биле вакцинирани, а потоа не сакале да ја примат втората доза, имаме деца - и сите овие групи ќе мора да постојат една до друга. Тој рече дека очекува ова да доведе до локални епидемии, но повеќе нема да дојде до пандемски бран.