Република Србија и останатите бивши држави на СФРЈ огласиле продажба на две недвижнини. За една од нив, куќа на Петата авенија, заинтересирани се шест потенцијални купци,објавува „Њујорк пост“.

Постои можност цената на таа куќа да дојде и до 50 милиони долари. Во неа била сместена Мисијата на Србија во Обединетите нации, а според изјавите на Тристан Харпер од агенцијата „Даглас Елиман“, таа е недопрена и оној кој што ќе ја купи ќе поседува „дел од историјата на Њујорк“.

Кои се купците е сѐ уште тајна иако е наведено дека се добро ситуирани поединци. Зградата се наоѓа на најпрестижниот дел од Петтата авенија со поглед кон Централ парк. Има четири спрата со 18 соби, 6 тоалети и вински подрум. Има и електричен лифт кој е сѐ уште во функција.

Во цената влегува и мебелот, сликите, златен светилник и други позлатени детали. Во овој објект отседнувал Јосип Броз Тито за време на престоите во Њујорк, а купен е од Федеративна Народна Република Југославија во 1947 година. Куќата е изградена во 1904 година, а прв сопственик е гувернерот Лонг Ајленд Роберт Бикман Ливингстон. Сопственичка била и Емили Вандербилт Вајт, сопруга на Хенри Вајт, некогашен амбасадор на САД во Франција и Италија.

Покрај овој објект во продажба е уште еден објект на Парк авенијата – пентхаус кој властите на бивша Југославија го купиле во 1975 година.

Станува збор за шестособен дуплекс апартман со четири тоалета, кој во тоа време го користеле југословенските амбасадори во ОН, а чија цена изнесува околу 20 милиони долари.

Минатата недела конечно е договорена продажбата на недвижнините на Петта авенија, но на договорот ќе бидат потребни потписите на претставници од сите држави на Југославија. Покрај овие, Југославија продава недвижнини и во Јапонија, Германија и Швајцарија.