Селото Бергун во Швајцарија забрани фотографирање на својот живописен планински пејзаж, со цел да не се вознемируваат луѓето кои немаат можност да го посетат овој крај.

Властите во селото Бергун велат дека кога луѓето го гледаат овој прекрасен предел  на фотографии се чувствуваат „несреќно“ затоа што не можат да дојдат и да го посетат, но корисниците на социјалните мрежи реагираат на ваквата одлука, порачувајќи им дека во тој случај, селото би требало да го „преместат“ во Северна Кореја.

Локалната општинска управа донела одлука за забрана за фотографирање на пејзажот, соопшти локалната туристичка организација. „Научно е докажано дека убавите фотографии со прекрасни пејзажи од одморите и патувањата, многу луѓе ги прават несреќни затоа што немаат можност да одат на тие места“, се наведува во соопштението.

Оние кои не сочувствуваат со „несреќата“ на другите луѓе и сепак ќе одлучат да ги сликаат овие прекрасни природни убавини, ќе мораат да платат „симболична“ парична казна од пет швајцарски франци.