„Мајкрософт“ подготвува ново ажурирање на системот „Виндоус 10“ под името Autumn Creators Update, со многу нови опции. Меѓутоа, еден од најдолговечните додатоци на „Виндоус“ ќе престане да постои – Мајкрософт Пеинт.

Првпат „Пеинт“ бил објавен со првата верзија на „Виндоус 1.0“ во 1985 и бил еден од првите графички уредници (едитори) што го користеле милиони луѓе.

На почетокот постоел како еднобитна црно-бела лиценцирана верзија на PC Paintbrush на ZSoft-овиот, а дури со „Виндоус 98“ можел да прави слики во JPEG формат.

Со новата верзија на „Виндоус 10“ ќе пристигне Paint 3D, кој има и опции за создавање 3D слики и кој нема ништо слично со стариот „Пеинт“.

Иако никогаш не бил особено напреден, секогаш сте можеле да го користите за нешто да начкртате или да направите брз cut/paste потег.

„Мајкрософт“ сè уште не потврдил дека ќе ја отстрани долговечната апликација, но изгледа како деновите дефинитивно да ѝ се одброени.