Иако гостите во холандските барови не се обврзани да покажуваат ковид-пропусница за пиење и јадење на терасите, сепак, ќе мора да имаат пропусница ако сакаат да одат во тоалет, објави холандското Министерство за здравство.

Холандските власти минатата недела укинаа некои ограничувања, вклучително и физичката дистанца, но најавија ковид-пропусници за барови, ресторани и фестивали.

- Ако сакате да го користите тоалетот, ќе мора да го покажете вашиот код - велат од Министерството, потсетувајќи дека QR-кодот со кој се потврдува дека некое лице е вакцинирано е задолжителен за граѓаните над 13 години.

Меѓутоа, холандскиот премиер Марк Руте неодамна рече дека не е добра идеја да се направи исклучок за гостите што седат на терасите на кафулињата бидејќи луѓето неизбежно ќе мора да влезат да ја платат сметката или да одат во тоалет.

- Владата сакаше ковид-пропусниците да бидат присутни насекаде во хотелската индустрија - вели Ринске Виман, портпаролка на холандското Министерство за здравство, додавајќи дека тоа не треба да им пречи на луѓето што сакаат повеќе слобода.