Познато е дека ИТ-секторот се развива многу брзо и дека е еден од најпопуларните кога станува збор за изборот на саканата професија.

Бројот на ИТ-компании во Србија расте, но расте и побарувачката за програмери. Брендирањето на работодавците е составен дел од оваа потрага по персонал, а може да се направи и на хумористичен начин - покажа новосадската компанија „ИТ енџин“.

Кон крајот на септември на социјалните мрежи се појави видео со тема „Интервју на човечки ресурси со јуниор девелопер“, а по две недели и интервју со сениор. Главни актери на скицата се Милош Милаковиќ и Наташа Мрѓа, кои на комичен начин прикажаа како не се одржува интервју за работа.
 
Имено, кампањата почна со интервју за работа со јуниор (Милош Милаковиќ) и личност од човечки ресурси (Наташа Мрѓа). Видеото покажува дека кандидатот е подготвен на сѐ само за да започне кариера во ИТ-индустријата. Пораката на крајот од видеото е: „Ова НЕ е интервју за работа. Дојдете кај нас и видете како го правиме тоа“.


Во ИТ-индустријата брендирањето на работодавците е од големо значење бидејќи голем број компании што работат во Србија бараат нов кадар.
 
„ИТ енџин“ е компанија од Нови Сад која се занимава со развој на софтвер веќе 10 години и нејзиниот тим во моментов се состои од 43 вработени, а тие работат со клиенти кои претежно се од Швајцарија, Холандија, Шведска, Германија и Америка.

Кампањата, која почна кон крајот на септември, предизвика многу коментари на социјалните мрежи, а на кој начин тимот на „ИТ енџин“ дошол до оваа идеја, објаснува извршниот директор Бојан Зрниќ.
 
- По 10 години постоење без маркетинг и онлајн рекламирање, сакавме да направиме нешто сосема поинакво од она што моментално е присутно на социјалните мрежи. Идејата беше да го претставиме преку смешни видеа и нашата маркетинг-менаџерка, Милана Божичиќ, која стои зад кампањата, дојде до одлична идеја да почнеме соработка со сценаристите Милош Милаковиќ и Васили Гломажиќ и нивниот тим, бидејќи би биле одлични за нашата целна група. Така и беше - вели Бојан Зрниќ, додавајќи дека идејата за поинаков пристап кон маркетингот дошла од секојдневната работа со колеги кои уживаат во одлична атмосфера, што го потврдува нивното мото „Само лесно“.