Сметаме дека во моментов бранот е во надолен тренд и веруваме дека ова ќе продолжи околу еден месец. Не покажува карактеристики дека во текот на летото ќе биде потребна промена на моделот што го следиме, истакна министерот за здравство на Грција, Танос Плеврис, во интервју за грчката телевизија ЕРТ, уште еднаш потенцирајќи дека не се разгледува можноста за воведување ковид мерки во текот на летото.

Плеврис објасни дека конкретниот бран има целосно различни карактеристики од претходните и поради имунизацијата на населението, но и поради мутациите кои се поразлични и не носат тешки хоспитализации, додавајќи дека конкретниот модел што го следат, без мерки, не е поради туризмот, туку е нешто што го следат и другите европски земји.

-Во овој момент влегуваме во фазата во која коегзистираме со коронавирусот не како прашање на избор, туку како реалност. Пандемијата влезе во фаза кога луѓето полесно се разболуваат бидејќи постои голема раширеност. Поради тоа што имаме вакцинирана популација, нема тешки хоспитализации како што беше во првата фаза. Имаме хоспитализации, но ги немаме тешките што ги имавме со делта и на почетокот на омикрон, кога имаше страшен притисок - рече Плеврис.