Мозочниот удар е водечка причина за инвалидност во светот и вториот најчест предизвикувач на смрт, но раната интервенција може да спречи сериозни последици. Нова студија предводена од истражувачи од болницата „Бригам и жените“ и нивни соработници резултирала со развивање нов тест преку комбинирање на биомаркери во крвта со клинички резултати за идентификување пациенти со мозочен удар со затнати големи крвни садови (ЛВО).

Повеќето мозочни удари се исхемични, при што протокот на крвта до мозокот е попречен. ЛВО ударите се агресивен тип на исхемични удари кои се случуваат кога има опструкција во голема артерија во мозокот. Кога снабдувањето на мозокот со крв е компромитирано, недостигот на кислород и нутритиенти предизвикува изумирање на мозочни клетки во неколку минути. ЛВО ударите се состојби кои бараат брз третман со механичка тромбектомија, хируршка процедура со која се отстранува блокадата. Колку побрзо се направи овој зафат, толку подобри ќе бидат резултатите, велат експертите.

Истражувачкиот тим претходно се фокусирал на два специфични протеини кои се наоѓаат во капиларната крв, едниот е GFAP, а другиот Д-димер. Во оваа студија тие покажале дека нивоата на овие биомаркери во крвта, во комбинација со прехоспиталното проценување на пациентите со мозочен удар до прием во брза помош (FAST-ED), може да ги идентификуваат ЛВО исхемичните удари, притоа исклучувајќи ги другите состојби како мозочно крвавење. Мозочните крвавења предизвикуваат слични симптоми како ЛВО ударите, па се тешки за разликување, но лекувањето на двете состојби е сосема различно.

Истражувачите утврдиле дека комбинирањето на биомаркерите (GFAP и Д-димер) со FAST-ED помалку од 6 часа по појавата на симптомите овозможило тестот да детектира ЛВО удари со прецизност од 93 отсто и чувствителност од 81 отсто.

Тимот смета дека оваа дијагностичка алатка може да има голем потенцијал за употреба во помалку развиените земји, каде што напредните снимки не се секогаш достапни.

Извор: Science Daily
Фото: Freepik