Со овации, одушевување и долг аплауз, срдечно реагираше публиката по премиерата на македонскиот документарен филм „Медена земја“ („Honeyland“) што се одржа синоќа во Јута, САД, во рамките на Филмскиот фестивал „Санденс“.
Критичарите ги бележеа своите импресии уште за време на проекцијата, а по само неколку часа од премиерата се огласија со позитивни критики во медиумите и преку социјалните мрежи.
Познатиот филмски критичар Ентони Кауфман од „Скрин интернешнал“ по премиерата на „Медена земја“ кажа:
- Бев скептичен, но откако го гледав, се убедив дека шпекулациите што се ширеа на „Санденс“ за македонскиот документарец „Медена земја“ се вистинити. Овој документарец е совршен колку што еден документарец би можел да биде.
Шери Линден од престижниот „Холивуд репортер“ напиша: - Во оваа ера на кризи на изумирање, загрозени природни живеалишта, безобѕирно профитирање, а да не зборуваме за работата на Одделот за внатрешни работи на Трамп, „Медена земја“ раскажува приказна со универзален одглас, дури и кога открива заборавено место кое е толку специфично и необично, што повеќето современи луѓе од западниот свет никогаш не би можеле ни да го замислат.
Со позитивни коментари се огласија и Крис О'Фалт од „Индивајр“, Ерик Хајнс од „Филм комент“, Соња Епштајн од „Слоан сајанс енд филм“ и други.
‒ Исклучително рафинираното чувство за препознавање на уникатниот документаристички филмски јазик и повеќеслојноста во овој наратив беше провокација за публиката која по премиерата, во минутите определени за прашања и одговори, настапи со огромна љубопитност и многу комплименти и според еден од организаторите на „Санденс“, ова е еден од ретките документарци на фестивалот, воопшто, на кој целата публика останала на „прашања и одговори“ по филмот - откри екипата на филмот.
„Медена земја“ во режија на Љубо Стефанов и Тамара Котевска е во официјална конкуренција на престижниот фестивал за независни филмови „Санденс“ во категорија со уште 11 други документарни филма од целиот свет. Покрај режисерите, на премиерата на „Санденс“ присуствуваа и продуцентот и монтажер на филмот, Атанас Георгиев, и снимателите Фејми Даут и Самир Љума.
Веднаш по премиерата беше организиран и промотивен настан за „Медена земја“ во Парк Сити, на кој беше дегустиран автентичниот мед, собран од Атиџе - главната протагонистка во филмот, како и македонски висококвалитетни вина.
Режисерите на филмот, Љубо Стефанов и Тамара Котевска
Во рамките на фестивалот, кој трае до 3 февруари, ќе следуваат уште шест проекции. „Санденс“ е најголем американски фестивал на независен филм и еден од најпрестижните во светот, на ниво на фестивалите во Берлин, Кан, Венеција и други.
Ова е првпат македонски долгометражен документарен филм, со мнозинска домашна копродукција, да влезе во конкуренција на „Санденс“ и токму поради тоа е од големо значење за македонската кинематографија.
Годинава го очекуваат презентации на значајни светски фестивали. Премиерата во Скопје ќе се одржи на почетокот од март.
„Медена земја“ раскажува приказна за Атиџе, последната жена-одгледувач на диви пчели во Европа, која живее сама со својата мајка во централна Македонија. Главна идеја на филмот е да се прикаже припадноста на човекот кон природата и нарушувањето на природната рамнотежа преку судир на два различни начина на искористување на ресурсите на Земјата.
Музиката на „Медена земја“ е на групата „Фолтин“, а како музички супервизор се јавува Рана Еид од „ДБ Студиос“ (DB Studios) од Бејрут. Документарецот, кој е во продукција на „Аполо медиа“ и „Трис филмс“, е реализиран како дел од Програмата за зачувување на природата во Македонија - проект на Швајцарската агенција за развој и соработка (SDC), а е поддржан и од Агенцијата за филм на Република Македонија.