Кога гледаме тениски натпревари денес, светложолтите тениски топчиња се нешто што го земаме здраво за готово. Сепак, историјата на бојата на тениските топчиња крие интересни анегдоти и промени што го обликувале модерниот тенис. Порано тениските топчиња биле бели или црни, но на крајот на 20 век станале светложолти. Како дојде до оваа промена и кој е заслужен за неа?
Иницијатива за промена на бојата
Иницијативата за промена на бојата на тениските топчиња дошла од Меѓународната тениска федерација кон крајот на 70-тите години. Причината за оваа промена било воведувањето телевизиски преноси во боја. Имено, белите тениски топчиња тешко се гледале на тогашните телевизиски екрани, што им отежнувало на гледачите дома да ги следат натпреварите. Препознавајќи го овој проблем, Меѓународната тениска федетација спровела истражување за да најде боја што ќе биде повидлива на екраните.
Фото: Freepik
Процес на избор на бојата
Еден од клучните луѓе во овој процес бил Сер Дејвид Атенборо, познат британски натуралист и телевизиски продуцент, чии серии „Сината планета“ и „Планетата Земја“ биле рангирани на прво и на второ место меѓу највлијателните серии на сите времиња. Атенборо тогаш бил директор на програми на Би-би-си и го препознал проблемот со видливоста на белите топчиња на телевизија. Заедно со експерти од Меѓународната тениска федерација, Атенборо истражувал и тестирал различни бои за да ја најде онаа која најдобро ќе се гледа на телевизиските екрани.
Воведување на светложолти топки
По бројните тестови, била избрана жолтата бидејќи се покажала како највидливата боја на различни површини и најлесна за следење на телевизиските екрани. Оваа боја не само што ја подобрила видливоста на телевизија, туку и им олеснила на играчите и гледачите на теренот да ја следат топката во текот на играта. Промената на бојата на тениските топчиња била официјално воведена во 1972 година, кога Меѓународната тениска федерација одлучила дека сите топки што се користат на професионалните турнири мора да бидат светложолти.
Влијание врз тенисот
Промената на бојата на тениските топчиња имала позитивно влијание врз популарноста на тенисот како спорт. Телевизиските преноси станале многу појасни и повозбудливи, што привлекло повеќе гледачи. Тенисот станал попопуларен на глобално ниво, а модерните натпревари станале визуелно попривлечни и за играчите и за гледачите.
Промената на бојата на тениските топчиња во светложолта можеби изгледа како мала промена, но имало значително влијание врз развојот и популаризацијата на тенисот. Оваа иницијатива на Меѓународната тениска федерација и визијата на Сер Дејвид Атенборо покажуваат како технолошкиот напредок и потребите на гледачите можат да ги обликуваат спортовите што ги сакаме и гледаме. Денес светложолтите тениски топчиња се симбол на модерниот тенис и сведок на важен момент во историјата на спортот.
Извор:
24sedam.rs
Фото: Freepik