Исланд е најбезбедна земја во светот, според листата на њујоршкиот магазин „Глобал фајненс“, додека Македонија е рангирана на 59. место меѓу 128 држави опфатени со анализата.


Од земјите во регионот најдобро котира Словенија на 12. место, Хрватска е на 22., Бугарија на 42., Босна и Херцеговина на 56., Грција на 57., Србија на 58., а Албанија на 69. место на листата.

Во образложението на листата, магазинот наведува дека при рангирањето биле земени предвид три фактори: војната и мирот, личната безбедност и ризикот од природни непогоди.

Резултатот ги сумира индексите на трите ризици и претставува сеопфатен поглед на безбедноста на секоја земја одделно, што значи дека високо ниво на ризик кога е во прашање еден фактор има големо влијание врз конечното рангирање на земјата, наведува „Глобал фајненс“.

Според магазинот, тоа што Филипините се наоѓаат на последното место, зад Јемен, каде што се води граѓанска војна, се должи на фактот што земјата има „лоши резултати“ во однос на личната безбедност и зачестеноста на природни непогоди.

 - Ужасниот резултат на Јемен е последица на војната и гладот, но оваа земја има сосема мал ризик од природни непогоди. Затоа Филипините се полошо рангирани од Јемен, иако Јемен е воена зона - истакнува „Глобал фајненс“.

На врвот на листата меѓу првите 20 земји, дури 16 се од Европа, а покрај нив, надвор од европскиот континент се само Катар, Сингапур, Нов Зеланд и Канада.

- Економскиот развој по сè изгледа го намалува ризикот од избувнување воен судир или насилство во семејството. Во суштина, овие два фактора се поподложни на контрола отколку ризикот од природните непогоди, врз кои често влијае географијата - наведува магазинот.

Сепак, има неколку значајни исклучоци за некои економски развиени земји, како што се САД, што се должи на фактот дека ризикот од насилни злосторства е поголем поради високата стапка на убиства, што влијае на намалување на личната безбедност. Дополнително, САД имаат и поголем ризик од природни непогоди.