Ново истражување сугерира дека фокусот на здрава исхрана не треба да биде на тоа што го исфрлате од исхраната (на пример, намален внес на јаглехидрати или калории). Наместо тоа, акцентот треба да биде на тоа што го внесувате во организмот и на квалитетот на тие намирници.

Истражувањето, кое следело речиси 200.000 мажи и жени во САД во период од приближно 30 години, покажало дека некои диети со малку масти и малку јаглехидрати се подобри за здравјето на срцето од други.

Клучот бил во квалитетот на самата храна, а не во количината на јаглехидрати или масти.

Истражувањето, водено од експерти за јавно здравје од Универзитетот „Харвард“, покажува дека ако во исхраната има премногу преработена храна и животински протеини или масти, или ако недостигаат зеленчук, овошје, интегрални житарки и здрави масти, тоа долгорочно можеби нема да донесе значајни придобивки за кардиоваскуларното здравје дури и ако диетата формално се смета за „нискојаглехидратна“ или „нискомасна“.

- Нашите резултати покажаа дека не станува збор само за намалување на јаглехидрати или масти, туку за квалитетот на храната што луѓето ја избираат - вели епидемиологот Жијуан Ву од „Харвард“ кој го водел истражувањето. Тој додава дека фокусирањето исклучиво на нутритивниот состав, без внимание на квалитетот на храната, можеби нема да донесе здравствени придобивки.

Учесниците во истражувањето што се хранеле со здрава и разновидна храна имале повисоко ниво на т.н. „добар холестерол“, како и пониски нивоа на масти и маркери на воспаление.

Тие имале и значително помал ризик од развој на коронарна срцева болест - најчестата причина за срцев удар.

- Овие резултати покажуваат дека здравата исхрана со малку јаглехидрати и малку масти можат да делат заеднички биолошки патишта што го подобруваат кардиоваскуларното здравје. Фокусирањето на целокупниот квалитет на исхраната може да им даде флексибилност на луѓето да изберат начин на исхрана кој им одговара, а сепак го поддржува здравјето на срцето - објасни Ву.

Овие наоди се базирани на самопријавени податоци за исхрана од учесниците, кои биле здравствени работници, па можеби имале поголема здравствена свесност и пристап до здравствена заштита од општата популација.

Овие резултати се надоврзуваат на сè поголем број докази дека за здравјето генерално е најдобро да се јаде помалку преработена храна, а повеќе интегрални житарки и зеленчук. Строгите диети во кои се бројат калории, јаглехидрати или масти можеби не се неопходни.

- Ова истражување помага да се помести разговорот подалеку од долгогодишната дебата за диети со малку јаглехидрати наспроти диети со малку масти. Наодите покажуваат дека за здравјето на срцето најважен е квалитетот на храната. Без разлика дали исхраната содржи помалку јаглехидрати или масти, акцентот на растителна храна, интегрални житарки и здрави масти е поврзан со подобри кардиоваскуларни исходи - вели кардиологот Харлан Крамхолц од Универзитетот „Јејл“.

Извор: Nova.rs
Фото: Magnific