Секоја година, на падините на планината Ингино над италијанското гратче Губио, ноќите ги осветлува најголемата новогодишна елка на светот, еден од најпознатите симболи на божиќниот период во Умбрија и цела Италија.
Губио е едно од најубавите средновековни гратчиња во централна Италија. Спектакуларната светлосна инсталација првпат била поставена во 1981 година, а во 1991 станала дел од Гинисовата книга на рекорди. Дрвото се состои од повеќе од 700 светилки поврзани со приближно 8.500 метри електрични кабли и се гледа од километри оддалеченост.
Обликот на елката е обележан со повеќе од 300 зелени светла, а внатрешноста е исполнета со повеќе од 400 шарени ламби. Ѕвездата на врвот има површина од околу 1.000 квадратни метри и ја сочинуваат повеќе од 250 светла, кои се протегаат сè до базиликата на свети Убалдо, заштитникот на градот.
Целата инсталација е висока околу 750 метри, широка 450 метри и голема колку 30 фудбалски терени. Токму поради својата импресивност, секоја година привлекува илјадници посетители од Италија и светот.
Од самиот почеток проектот го одржува група посветени волонтери. Ламбичките традиционално се палат на 7 декември, со свечена церемонија на која учествуваат истакнати личности од културата, науката и хуманитарната работа. Меѓу оние кои низ годините учествувале во церемонијата на палењето ламби биле двајца папи: Бенедикт XVI и Франциск, како и претседателот на Италија, Џорџо Наполитано.
Сите кои сакаат можат да учествуваат во иницијативата „Посвоj светло“ и да го посветат на сакана личност со донација од 15 евра. Собраните средства делумно се користат за покривање на трошоците за електрична енергија. Секоја ламбичка е достапна за посвојување за време на божиќната сезона, а следната година повторно се отвора за нови посветувања.
Извор:
Zimo.dnevnik.hr
Фото: Facebook