Поминаа седум години од втората сезона на серијата „Големи мали лаги“, но се чини дека враќањето во Монтереј конечно се приближува. Иако Ејч-би-о официјално не ја потврди третата сезона, сè повеќе детали укажуваат дека продолжението е во подготовка.

Големо навестување пристигна од Никол Кидман, која претходно откри дека публиката може да очекува трета сезона на серијата. Актерите, вклучувајќи ги Рис Витерспун и Лора Дерн, повеќе пати истакнаа колку сакаат да им се вратат на своите ликови и колку им недостига динамиката што ја создадоа на екранот.

Еден од клучните проблеми беше пронаоѓањето на вистинската приказна која достојно би го продолжила драматичниот крај на втората сезона, кога Бони (Зои Кравиц) ѝ се предаде на полицијата, а „Монтерејската петорка“ конечно се соочи со последиците од своите постапки.

Добрите вести пристигнаа во септември 2025 година, кога беше потврдено дека сценариото за третата сезона ќе го пишува Франческа Слоун. Уште поинтересно е што новата сезона ќе биде заснована на продолжението на романот на Лијан Моријарти, авторката на оригиналната приказна, чија книга ќе излезе во август 2026 година.

Дејството на новата сезона веќе навестува нова мистерија - непознат маж кој се врти околу училиштето и вознемирувачки пакет со отсечен прст кој пристигнува кај директорот покренуваат низа настани кои повторно ќе ја затресат оваа навидум совршена заедница.

Истовремено, ликовите ќе се соочат со лични кризи - Медлин со најголемиот предизвик во животот, Џејн со проблеми во бракот, додека Рената, се чини, конечно ќе ужива во својата верзија на одмазда. А однесувањето на Мери Луиз станува сè поневообичаено, што дополнително ја продлабочува тензијата.

Она што ќе ги израдува обожавателите е информацијата дека се очекува враќање на комплетната оригинална екипа, што значи дека повторно би можеле да ја гледаме и Мерил Стрип во една од најинтригантните улоги во серијата.