Околу 1.600 завршени средношколци сакаат да студираат на Универзитетот „Гоце Делчев“ во Штип, покажуваат бројките од првиот уписен рок за запишување на студенти во прва година за академската 2018/2019 година, јави МИА.

Проректорот на Универзитетот „Гоце Делчев“ - Штип, Кирил Барбареев, на денешната прес-конференцијa информира дека во рамките на оваа бројка се и пријавените 120 странски студенти од Турција, Србија и од Бугарија. Забележува дека се пополнети квотите за општа медицина и на студиската програма за медицински сестри, каде што има голем интерес.

- Во моментов ќе се консултираат студентите за нивната втора и трета опција. Се очекува и во вториот уписен рок да има голем интерес за Факултетот за медицински науки - вели Барбареев.

Тој истакна дека се добри и бројките на факултетите за информатика, филолошкиот, економскиот, правниот.

- Генерално постои некој баланс меѓу општествените и хуманистичките науки и меѓу техничките и природните науки. Кога ќе се соберат сите бројки, може да се каже дека сите факултети и центри на универзитетот ќе имаат пристојна бројка, соодветна за нормална работа и функционирање на факултетите - рече Барбареев.

Идните студенти, кои се примени во првиот уписен рок, можат да се запишат на факултетите и академиите на штипскиот универзитет на 12 и 13 септември, а веќе од 14 до 17 септември ќе биде и вториот уписен рок на оние факултети, каде што има слободни места за одредени студиски програми.
Штипскиот универзитет веќе се подготвува и за првиот академски час, кој оваа година е на 1 октомври.