Штом ќе помине празничната сезона, многумина од нас ќе почнат да размислуваат за планот за следната година, кој неминовно ќе вклучува здрав живот, диета, вежбање што се одложува од понеделник до понеделник и слично. И тогаш сите на интернет ќе бараме совет од тренери, нутриционисти и други експерти, но за ефикасно согорување на калории - секој ден и во секоја пригода - не треба да гледаме подалеку од култната британска комична група „Монти Пајтон“.

Министерство за смешно одење

Легендарните Британци создадоа десетици скечеви кои веднаш станаа дел од поп-културата и колективната свест, а еден од најпознатите е „Министерството за смешно одење“, пародија на бирократскиот систем објавена во 1970 година (но сепак многу актуелна). Во тој скеч Џон Клиз го прослави своето смешно одење, а освен што ја инспирира публиката, неодамна со ова одење инспирира и група истражувачи од американскиот државен универзитет во Аризона.


Истражувањето го спровеле на 13 испитаници, од кои се барало да одат по патека долга 30 метри во различни стилови, а потоа им ја измериле потрошувачката на калории.

Основното одење било нормалното човечко одење, а другите две одења имале цел да копираат два лика од познатиот скеч: Пути и Тибег. Резултатите се интересни. Ако одите како Тибег, ќе потрошите 2,5 пати повеќе енергија отколку при нормално одење. Со само 11-минутна ваква прошетка дневно ќе ја постигнете неделната цел од 75 минути интензивно вежбање, додека по 12-19 минути од таквото одење ќе согорите 100 калории.

- Пред половина век „Министерство за смешно одење“ несвесно стана моќен начин за зголемување на кардиоваскуларната кондиција кај возрасните - заклучуваат авторите на студијата.