Наставниците кои учествувале во анкета во Холандија велат дека нивните ученици им поставуваат прашања поврзани со холокаустот, откако претходно наишле на дезинформации на социјалните мрежи.
Наставниците во училиштата низ Холандија се соочуваат со зголемен бран дезинформации поврзани со холокаустот, за кои сметаат дека учениците ги гледаат на социјалните мрежи, според ново истражување.
Повеќе од 190 наставници од средни училишта во Холандија одговориле на анкета на „НОС сторис“, дел од холандскиот јавен радиодифузер.
- Поради вештачката интелигенција и „Тик-ток“, учениците повеќе не знаат што е вистина, а што е лага - вели Мартен Пост, наставник по историја.
Пост истакнува дека му е драго кога учениците доаѓаат кај него со прашања наместо да донесуваат сопствени заклучоци врз основа на онлајн-дезинформации.
- Многу сум среќен кога доаѓаат кај мене со тие прашања. Тогаш можеш да објасниш и да започнеш разговор - додава тој.
Во еден пример, а ученици му покажале видео на „Тик-ток“ во кое се тврди дека нацистичката влада за време на Втората светска војна убила 271.000 Евреи, што е значително искривена и намалена бројка.
Меморијалниот музеј на холокаустот на САД проценува дека околу шест милиони Евреи биле убиени за време на холокаустот низ Европа што е приближно две третини од предвоеното европско еврејско население од околу девет милиони.
Една третина од анкетираните наставници изјавиле дека знаењето на нивните ученици е „недоволно“, а четири од десет наставници сметаат дека учениците ја минимизираат сериозноста на холокаустот.
Ова не е проблем само во Холандија. Во јануари, германски институции за меморија на холокаустот испратија отворено писмо до социјалните мрежи, барајќи да се спречи ширењето на лажни содржини што ја искривуваат историјата на холокаустот.
И музејот на Аушвиц предупреди дека вештачката интелигенција се користи за создавање лажни слики на жртвите од холокаустот, што го нарече „длабоко непочитување“.
Минатата година, ВИ-платформата „Грок“ на Илон Маск даде неточни или погрешни изјави за холокаустот по ажурирање на системот, што доведе до истрага од француските обвинители.
Извор:
Euronews.com
Фото: Magnific