European Film Promotion ја избра македонската актерка Сара Климоска како едно од десетте европски актерски откритија – European Shooting Stars 2021. Оваа манифестација се одржува во рамките на Меѓународниот филмски фестивал во Берлин и важи за едно од најпрепознатливите обележја на Берлинале, каде што актерите кои се избрани имаат неверојатно искуство и можност за воспоставување контакти со европски кастинг-агенции, филмски професионалци и етаблирани актери од Европа.
Годинава 24. издание на European Shooting Stars ќе се одржи дигитално, во период од 23 до 25 февруари, една недела пред 71. издание на Берлинале, додека официјалната церемонија за доделување на наградите за European Shooting Stars ќе се случи во Берлин во јуни 2021, кога ќе се одржува и дел од програмата со проекции на филмовите на фестивалот.
Во оваа престижна селекција Сара Климоска е избрана заедно со уште девет актерски имиња од Финска, Франција, Германија, Унгарија, Литванија, Ирска, Холандија, Португалија и Шведска, а поради нејзината улога во дебитантскиот филм на Игор Алексов - „Лена и Владимир“, во продукција на „Минд продукција“.
Сара Климоска
Во филмот „Лена и Владимир“, Сара ја глуми 16-годишната Лена, која никогаш се нема вљубено претходно, покрај средовечниот Владимир (Тони Науновски), кој пак има загубено сè што љубел претходно. Заедно доживуваат пролет во еден ладен јануари и се вљубуваат во животот. Сценариото е на Александар Русјаков. Филмот е поддржан од Агенцијата за филм и е завршен минатата година, но сè уште не е прикажан.
Во меѓународната организација European Film Promotion, каде што Агенцијата за филм е членка, досега во оваа програма учествувале многу познати актери од Европа како: Matilda de Angelis (The Undoing), Carey Mulligan (Promising Young Woman, The Great Gatsby), Alba Rohrwacher (Happy as Lazzaro), добитничката на Оскар - Alicia Vikander (Tomb Raider), Maisie Williams (Game of Thrones), Riz Ahmed (Rogue One: A Star Wars Story, Mogul Mowgli- Berlinale 2020), George MacKay (1917), како и Louis Hofmann (Netflix’s Dark), а од С. Македонија досега од оваа програма биле дел Благој Веселинов во 2019, Наташа Петровиќ во 2011 и Лабина Митевска 1998 година.