Квалитетниот сон и тоа како е потребен, но со секојдневниот стрес и многуте обврски не сите имаат време да се наспијат, а и да се разбудат свежи наутро. Заспивањето и будењето се процеси во мозокот кои не ги разбираме целосно, па истражувањата покажуваат дека овие транзиции се постепени.

Постојат некои секојдневни навики што влијаат врз вашето спиење:

-    Светлината наутро помага за ресетирање на телесниот часовник и за одржување на срцевиот ритам. За да имате правилен распоред на спиењето и на будењето, се препорачува да поминете одредено време на утринска светлина по будењето. Додека, пак, поголемата количина светлина навечер го отежнува заспивањето бидејќи го намалува лачењето на мелатонинот, хормонот кој поттикнува спиење. Затоа не се препорачува користење мобилен телефон и други електронски уреди пред легнување.

-    Јадењето обилен оброк пред спиење може да предизвика срцебиење и тоа да ве спречи да заспиете. Храната нема добро да се свари и сето тоа е преголем притисок за организмот.
-    Алкохолот ве прави поспани, но ако пиете пред спиење, тоа може да ви го наруши сонот. Предизвикува почесто будење, потење, кошмари, главоболки.

Совети што ќе ви помогнат да заспиете или да останете будни

1. Направете топла бања или читајте книга пред спиење за да се релаксирате. Можете да се напиете и чаша топло млеко. Не се препорачува вежбање, играње игри на компјутер или гледање ТВ пред спиење.

2. Поставете добар распоред на спиење и држете се до него. Телото има внатрешен часовник кој ги контролира спиењето и будењето. Ако имате регуларна рутина, часовникот ќе работи најефикасно.

3. Креирајте добра средина за спиење – тивка, темна и со пријатна температура.

Првите 15 минути по будењето можат да бидат тешки за сите, а тоа е така бидејќи мозокот во тој период не функционира правилно – состојба наречена „инерција на сон“. Се случува веднаш по будењето поради тоа што одредени делови од мозокот уште се во состојба на спиење.