Ѕвездите и креаторите на серијата „Пријатели“ моментално водат преговори со Ејч-би-о за враќање пред малите екрани во вид на специјална серија.
Џенифер Анистон, Кортни Кокс, Лиза Кудроу, Мет ле Бланк, Метју Пери и Дејвид Швимер би требало повторно да ја глумат популарната њујоршка шесторка доколку преговорите за снимање со Ејч-би-о Макс бидат успешни.
Сценариото сè уште не е напишано, а во преговорите наводно се вклучени и креаторите на серијата „Пријатели“, Дејвид Крејн и Марта Кофман.
Извори за „Холивуд репортер“ нагласуваат дека сè уште не е постигнат договор и дека треба да се заклучат договорите со актерите и креаторите.
Кога и ако дојде до договор, останува предизвикот за усогласување на распоредите на сите актери.
Шпекулациите за повторно обединување на „
Пријатели“ беа поттикнати поради сè повеќе заеднички фотографии на актерите од серијата објавени на социјалните мрежи во последно време, како и трансферот на серијата од „Нетфликс“ на новиот стриминг-сервис „Ејч-би-о Макс“ што треба да почне со работа наредната година.