Работилници, дебати, филмови, музика - накратко, така помина петтиот ден од окупацијата на факултетите. На Филолошкиот/Филозофскиот факултет, како и на околните факултети, настава нема и не се работи веќе шести ден.

На техничките факултети вчера беше четврти ден од прогласувањето на автономната зона. Денот почна со апел до граѓаните за храна и материјали, а заврши со порака до Министерството за одвивање на работната група во образовна институција. Следува соопштението од Студентскиот пленум:

„Во пресрет на утрешната средба на работната група, за која уште не знаеме време и место, Студентски Пленум инсистира претставници од Владата и Министерството за образование да дојдат конечно на академскиот простор. Посочуваме дека од овој момент па натаму преговорите не треба да се водат во Министерството за образование или Владата. Дебатата за универзитетот мора да се одвива на универзитетот.

Студентски Пленум останува на ставот дека апсолутно е потребен целосно нов закон, и дека со целиот свој капацитет ќе учествува во работните групи кои ќе го изготвуваат. Ние не гледаме причина зошто претставник од Владата или Министерството не би покажал доблест да се појави на академско тло. Тоа не мора да биде автономната зона, тоа може да биде било кој факултет, Универзитетската библиотека, може да биде Ректоратот, но пред сé може да е студентскиот дом „Гоце Делчев“, кој најдобро го одразува нивото на грижа за високото образование.

Потсетуваме, претставници на Студентскиот пленум не може да се заменат со претставник на студентскиот Парламент, затоа што мандатот на претседателот Кирил Спироски е истечен од октомври 2014 г. и тој не поседува никаков легитимитет да ги брани студентските права. Бидејќи ректорот на УКИМ ја свикува средбата на која претставници од Владата и Министерството за образование прифатиле присуство, логично е тие за прв пат да нé посетат.

Универзитетските врати се отворени!

Студентски пленум 15.02.2015“

Во меѓувреме погледнете како помина претходниот ден низ фотографии во ГАЛЕРИЈАТА.