Насилството започнува со неповрзаноста и изолираноста. Целото надворешно насилство започнува како внатрешна осаменост.

Една наставничка од САД го знае ова и се обидува да го искористи своето знаење за да влијае на своите ученици. Нејзиниот метод се состои од следново:

Секоја недела, таа бара од учениците да извадат лист хартија и на него анонимно да напишат имиња на 4 деца со кои би сакале да седат следната недела. Децата знаат дека можеби нема да им бидат исполнети желбите. Таа бара од учениците и да номинираат еден ученик за кого веруваат дека бил одличен таа недела. На крајот на секоја недела, наставничката ги проучува анонимните ливчиња и бара поврзаност меѓу нив.

Кој не е споменат во листовите?

Кој не знае кого би сакал да седи до него?

Кој никогаш не е номиниран?

Кој имал многу пријатели изминатата недела, а ниту еден неделава?

Наставничката не бара начин на сместување на учениците. Таа бара осамени деца. Таа бара деца кои не успеваат да се поврзат со другите ученици и ги открива оние чии таленти поминуваат незабележани од нивните соученици.

Бил Клеј, татко на ученик во класот на наставничката за која станува збор го објавил овој метод на „Фејсбук“.

- Таа спасува животи. Убеден сум во тоа. Таа спасува животи. - пишува тој.

Наставничката се пензионира годинава, по децении спасување животи.