Светски познатиот тенисер Новак Ѓоковиќ ќе биде ѕвезда на новата документарна серија на платформата "Amazon Prime" која ќе се емитува во САД, Велика Британија и Јапонија. Серијата ќе го прикажува животот на најдобриот тенисер во светот, како на спортскиот терен, така и на приватен план.
Во соопштението од "Amazon Prime" се вели дека серијата ќе прикаже што го движи овој шампион и што го мотивираше да биде најдобар на терен и надвор од него.
Серијата ќе ги опишува неговите навики за вежбање и неговите специјални навики во исхраната. Исто така ќе го опфати и приватниот живот на Новак, вклучувајќи го неговото заминување во родниот град Белград и неговото залагање за фондацијата “Новак Ѓоковиќ.
Снимањето на серијата Ѓоковиќ ја најави на маргините на US Open. Во таа прилика тој истакнал дека страста, грижата, посветеноста и самосвесноста се клучни карактеристики на шампионите, но дека е невозможно да се постигнат без поддршка.
“Јас сум среќен бидејќи ја имам поддршката на мојата фамилија и од мојот тим кои работат заедно со мене. Моите фанови се радуваат и тагуваат со мене од почетокот на мојата кариера на тенискиот терен и затоа сакам да споделам со нив сѐ што стои позади мојот успех. Сега сакам со нив да го споделам моето секојдневие, она што ми е важно, моите вредности, уверувања, навики и сакам да им ги претставам сјајните луѓе со кои сум опкружен“- изјавил Ѓоковиќ.
Од "Amazon Prime" велат дека Ѓоковиќ е еден од најпосветените, мултидимензионални, возбудливи и инспиративни спортисти во светот. Само претплатените корисници на сервисот на "Amazon Prime" ќе имаат прилика да погледнат во животот на светскиот шампион, татко и сопруг.