Правило од пет секунди – ако храната која ќе падне на подот ја подигнете за најмногу пет секунди можете да ја конзумирате.

Но, дали ова правило е вистинито? Бактериите можат да се пренесат на храната за помалку од една секунда, според научниците од Универзитетот во Њу Џерси, во зависност од површината на која храната паднала, како и во зависност од храната и влагата која ја содржи.

Правилото од пет секунди не е научно докажано и е само една обична изрека.

Сето ова било потврдено откако бил спроведен експеримент на четири видови храна : лубеница, леб, леб намачкан со путер и гумени бонбони. Храната била испуштена на површини од нерѓосувачки челик, керамички плочки, дрвена површина и тепих и тоа во времетраење од помалку од секунда, пет секунди, 30 и 300 секунди.

Површините биле контаминирани со бактерија слична на салмонелата. Извршени биле 2.560 мерења со сите видови на храна, на сите површини и временски комбинации.

Лубеницата која е речиси 90 проценти составена од вода покажала највисока стапка на загаденост, додека пак гумената бонбона најмала. Бидејќи бактериите се движат со влагата, затоа кај лубеницата се пренеле најбрзо, а и површината на лубеницата е поголема од онаа на останатите видови храна.

Важен е и видот на површината на која паднала храната – храната која паднала на тепих имала најмала стапка на загаденост додека пак, храната која паднала на плочки и на челик имала поголема стапка на загаденост. Што се однесува до дрвената површина, вредностите биле варијабилни.