Маја Кузманоска 18 години предава англиски јазик во ОУ „Вера Циривири-Трена“ во Скопје. Таа е една од првите блогерки во Македонија, а успехот и добриот одѕив на The Little Treasures ja мотивирале да создаде и свој бренд, кој постои речиси девет години

Инспирирана од традицијата и од детските сеќавања на вештите жени покрај кои растела, професорката по англиски јазик Маја Кузманоска од Скопје речиси десет години создава уметност. Нејзините рачни изработки на накит од платно и создаден со хеклање го одушевуваат светот. Токму еднo од најпрестижните списанија за креативност - Artful Blogging ѝ отстапи простор за да ја раскаже приказната за својот блог и бренд The Little Treasures


Инспирирана од детството

Факултети.мк ја раскажува нејзината приказна. Со задоволство се наврати на детството и на своето семејство во кое традицијата била длабоко вкоренета и почитувана, а рачната работа, како нејзин важен и нераскинлив сегмент, била од непроценлива важност.
- Жените во моето семејство беа посветени на рачната работа, дали од потреба или само заради чисто уживање - се плетеа џемпери, шалови и капи, се хеклаа чаршафи и милјеа, се шиеше облека. Ние, децата, секогаш бевме вклучени во овој природен процес и охрабрувани да создаваме и да ги развиваме вештините. Од првите, нерамномерни и искривени котелци, преку стаклени, хартиени и глинени мониста, еве сум тука, каде што мојата игра никако не запира и со љубов ја негувам - вели Кузманоска.
Таа е една од првите блогерки во Македонија. Успехот и добриот одѕив на The Little Treasures ja мотивирале да создаде и свој бренд, кој постои речиси девет години. Нејзината ќерка Ива со гордост го промовира накитот.


Тантелата и дрвената мониста ми се омилени

Денес најмногу е препознатлива по своето уметничко име Маја Кузман и по своите ѓердани и манжетни – бразлетни, по кои е позната најмногу во „хеклачкиот свет“.
- Задоволна сум што веќе имам круг на постојани купувачи. Денес, со помош на интернетот е многу лесно да се допре до огромен број интересенти. Социјалните медиуми многу ми помагаат и со задоволство ги користам. Реакциите се прекрасни и претставуваат неверојатен извор на волја и енергија да продолжам со ова што го правам - вели професорката.
Бесценетите камења и златото никогаш не ѝ биле омилени материјали за од нив да создава уметност.
- Отсекогаш ме предизвикувал и повикувал рачно изработен накит од мешани материјали, оној што со себе носи приказна и предизвикува најразлични чувства. Го обожавaм металот замак што го користам за ориенталните парчиња накит, потоа секако памучниот конец, кој ми е и најважен, но и најразличен текстил. Слабост ми се тантелата и дрвените мониста - признава Кузманоска.


Таа 18 години предава англиски јазик во Основното училиште „Вера Циривири-Трена“ во Скопје. Смета дека просветните работници треба да бидат инспиративни личности за децата и со хобијата што ги негуваат.


Во августовското издание на онлајн-дневникот Artful Blogging беше поканета да ги раскаже своите почетоци.
Кузманоска периодов е фокусирана на својата детска колекција со работно име „Боемски бебиња“, а ја подготвува и пролетната колекција на накит и додатоци инспирирана од 50-тите години на минатиот век.