Претседателот на Франција, Емануел Макрон, зборувајќи пред околу двесте члена на неговото парламентарно мнозинство, петнаесет дена пред дебатата во Националното собрание и Сенатот за имиграцијата, закажана за 30 септември и 2 октомври, најави заострување на француската политика за азилот и имиграцијата, јавува дописникот на МИА.

Обраќањето на Емануел Макрон беше во рамките на претставувањето на главните поенти од програмата на вториот дел од неговиот мандат.

- Ова е прашање што мора да се земе со зрелост и смиреност. Франција отсекогаш била земја на имиграција. Прашањето е дали сакаме да бидеме буржоаска партија или не. Буржоазијата нема проблем со имиграцијата: тие не се среќаваат со неа. Популарните класи живеат со неа. Со децении левицата не сакаше да го разгледува овој проблем, така што работничката класа се пресели во крајната десница - рече Макрон пред учесниците на собирот.

Според анонимен учесник на средба, претседателот Макрон веќе покажал желба да ја заостри својата политика кон имиграцијата и азилот, понекогаш и со сурови зборови, како неговата желба да ги зголеми протерувањата на Албанците без документи - бидејќи Албанците и Грузијците се најмногубројни баратели на азил во Франција.

-Знаеме дека во иднина, еволуцијата на светот, постоењето области на конфликт, глобалното затоплување, ќе доведе до нови бранови на миграција. Ние мора да ја вооружиме нашата земја - рече владиниот портпарол Сибет Н’Дајај .

-Предизвик е да се знае дали Франција може да издржи прилив на еден милион луѓе од Магреб во случај на криза во една од земјите од регионот. Одговорот е не - вели еден министер.

Според годишното истражување „Француски фрактури“, спроведено за Ле Монд од Ипсос Сопра-Стериа, 64 отсто од Французите повеќе не се чувствуваат „дома како порано“, а 66 отсто веруваат дека имигрантите не се трудат да се интегрираат во Франција.