Институтот за хемија ги доби вработувањата што беа побарани како ургентни на крајот од август минатата година, вели за Факултети.мк проф. д-р Марина Стефова, раководителка на Институтот при Природно-математичкиот факултет во Скопје.
- Конечно добивме известување од Министерството за образование и наука дека е добиена согласност за вработување на 6 соработници и тие ќе бидат реализирани веднаш по завршувањето на парламентарните избори - вели Стефова.

Одобрени се вработувањата што биле побарани – за двајца асистенти и четири виши лаборанти (дипломирани хемичари), кои ќе овозможат нормализација на практичната настава и подобрување на човечкиот капацитет во истражувачките лаборатории на Институтот за хемија.

- Ова ќе придонесе за ублажување на катастрофалната состојба со млади соработници и се надеваме дека во иднина ќе биде овозможено редовно обновување на кадарот и задржување на најдобрите дипломирани студенти - вели Стефова.

Поради пензија или други причини, кадарот на Институтот во последните десет години се намалил од 44 на 20 (наставници, асистенти, лаборанти). Поради невозможните услови за работа, вработените и студентите во октомври излегоа на мирен полчасовен протест пред Институтот.