Заостанатите предмети пред кривичните судови во Англија и Велс би можеле да бидат решени дури за 300 години доколку не се спроведат реформи што ќе го намалат бројот на судења пред порота.
На ова предупреди британската министерка за правда Сара Сакман. Како што наведе таа, инвестициите и поголемата ефикасност почнуваат да ја стабилизираат состојбата, но сами по себе не се доволни за да го променат трендот.
- Се движиме во вистинска насока, но размерите на предизвикот се огромни. Во најтешките случаи, жртвите чекаат подолго од кога било досега, а со ова темпо би можеле да бидат потребни речиси 300 години за да се вратиме на нивото од периодот пред пандемијата - истакна Сакман.
Британското Министерство за правда соопшти дека бројот на нерешени предмети пред крунските кривични судови благо се намалил за само 37 случаи во периодот од крајот на декември минатата година до крајот на март годинава. Тоа е првиот квартален пад на бројот на заостанати предмети во последните три години.
Сепак, вкупниот број нерешени предмети и натаму изнесува 80.061, што е за 5 отсто повеќе отколку пред една година и повеќе од двојно во споредба со периодот пред ковид-пандемијата во 2019 година, кога имало 33.118 нерешени случаи.
Податоците покажуваат и дека рекорден број жртви чекаат повеќе од една година за почеток на судењето пред кривичните судови, при што речиси една четвртина од тие предмети се однесуваат на сексуални кривични дела.
Бројот на нерешени предмети пред магистратските судови достигнал 370.722 на крајот од март, што претставува зголемување од 11 отсто во споредба со истиот период минатата година.
Владата планира да го намали бројот на судења пред порота како дел од пошироката реформа на правосудниот систем, но предлогот наиде на остри критики од адвокатските здруженија.
Здружението на кривични адвокати оцени дека најновите податоци покажуваат дека заостанатите предмети постепено се ставаат под контрола и ги критикуваше плановите за ограничување на правото на судење пред порота.
Претставникот на Адвокатската комора на Англија и Велс, Брет Диксон, предупреди дека правосудниот систем и натаму е под силен притисок и ја повика владата да се насочи кон дополнителни инвестиции и реформи наместо кон намалување на бројот на судења пред порота.
Извор:
021.rs
Фото: Magnific